Bu gün Gülüstan sarayında Elm və Təhsil Nazirliyi, Təhsilin İnkişafı Fondunun təşkilatçılığı ilə ümummilli lider Heydər Əliyevin 100 illik yubileyinə həsr olunan Təhsilin İnkişafı Forumu keçirilir.
Oxu.Az-ın məlumatına görə, forumda elm və təhsil naziri Emin Əmrullayev, əmək və əhalinin sosial müdafiəsi naziri Sahil Babayev, Türkiyənin TED Universitetinin rektoru İhsan Sabuncuoğlu, iqtisadiyyat nazirinin müavini Elnur Əliyev və digər rəsmi şəxslər iştirak edirlər.
Forum çərçivəsində baş tutacaq “İnnovasiya ekosisteminin yaradılması”, “Universitet – sənaye tərəfdaşlığı”, “Gələcək üçün təhsil” mövzusunda panellər zamanı təhsil və iqtisadiyyatın inteqrasiyası, təhsil və əmək bazarı, sənaye ilə tərəfdaşlıq strategiyası, sənayenin təhsildən gözləntiləri, əlavə dəyərin yaradılması, ekosistemin inkişafında bankların rolu, tədqiqat və inkişaf ekosistemi, ömürboyu təhsil, əmək bazarının dəyişən tələbləri, süni intellekt və təhsil məsələlərindən bəhs olunacaq.
“Təhsildən tərəqqiyə” devizi ilə təşkil olunan forumda iştirakçılarla işgüzar əlaqələrin qurulması, birgə layihələrin planlaşdırılması, həmçinin innovasiya ekosisteminin yaradılması, dövlət-özəl tərəfdaşlığı, təhsil və iqtisadiyyatın inteqrasiyası kimi mövzular üzrə müzakirələr, iştirakçıları maraqlandıran sualların yerli və beynəlxalq mütəxəssislər tərəfindən cavablandırılması əsas hədəflərdəndir.
Forum “NEQSOL Holding”, bp şirkəti, SOCAR, ABB, Sumqayıt Texnologiyalar Parkı, “Azersun Holding” və “BestComp Group”un sponsorluğu ilə keçirilir.
İlhamə Əbülfət
Xeberal.az
