Futbol üzrə Azərbaycan Premyer Liqasının XXIV turunu izləyən azarkeşlərin sayı məlum olub.
Oxu.Az xəbər verir ki, ən yüksək göstərici Tovuzda qeydə alınıb. “Turan Tovuz”un “Zirə”yə 0:2 hesablı məğlubiyyətinə 4 min nəfər canlı şahidlik edib. Ən aşağı göstərici isə Bakıda qeydə alınıb. Bayılda keçirilmiş “Səbail” – “Qəbələ” (2:2) qarşılaşmasını cəmi 12 nəfər tribunadan izləyib.
“Şamaxı”nın evdə “Sabah”a 2:1 hesabı ilə qalib gəldiyi ev oyununda 1000 azarkeş qeydə alınıbsa, “Sumqayıt”ın öz meydanında “Kəpəz”ə eyni hesabla məğlubiyyətinə 800 fanat şahidlik edib.
Turun mərkəzi, həm də bağlanış matçı olan “Qarabağ” – “Neftçi” görüşü də elə böyük maraq çəkməyib. Əzəli rəqiblərin 1:1 hesablı heç-heçə etdiyi qarşılaşmanı 1 851 nəfər tribunadan izləyib.
Beləliklə, turun 5 oyununda ümumilikdə 7 771 azarkeş olub. Bu isə orta hesabla hər qarşılaşmada 1 554 nəfərin tribunada yer alması deməkdir.
Vaqif Verdiyev
Xeberal.az
