“Qarabağ”ın bu qış heyətinə qatdığı Yassin Benzia futbol üzrə Azərbaycan Premyer Liqasının XXIV turunda “Neftçi”yə qarşı oynamayacaq. Yarımmüdafiəçi zədə səbəbindən sözügedən matçı buraxacaq.
Klubun mətbuat xidmətinin rəhbəri Gündüz Abbaszadə Oxu.Az-a açıqlamasında bildirib ki, onun hansı müddətə sıradan çıxdığı hələlik bəlli deyil:
“Benzianın “Neftçi”yə qarşı oynamayacağı dəqiqdir. Onun əzələsində problem yaranıb. Hansı müddətə sıradan çıxdığı təkrar müayinədən sonra bəlli olacaq”.
Azərbaycan derbisini “Qarabağ”ın digər zədəliləri – Şahruddin Məhəmmədəliyev, Marko Yankoviç və Abbas Hüseynov da buraxacaq. “Ağ-qaralar”ın heyətində isə Rəhman Hacıyev oynamayacaq.
Bu gün “Azersun Arena”da keçiriləcək “Qarabağ” – “Neftçi” oyunu saat 20:00-da start götürəcək.
Vaqif Verdiyev
Xeberal.az