Suriyada baş verən zəlzələ zamanı dağıntılar altında dünyaya gələn körpənin xəbəri bütün dünyanı təsirləndirmişdi. Göbək bağı binanın qalıqları altında kəsilən uşaq dərhal xəstəxanaya yerləşdirilib. Təəssüf ki, uşağın valideynləri xilas ola bilməyiblər. Bu səbəbdən körpəni həyatda qalan yeganə qohumu – xalası və onun yoldaşı övladlığa götürüblər.
Uşağa müalicə aldığı xətəxanada Eye adı verilsə də, yeni ailəsi onu anasının adı ilə Afra adlandırıb. Hazırda onlar çadırda yaşayırlar.
Afranın xalasının əri Halil Şam Sevadinin sözlərinə görə, onlar 2014-cü ildə İŞİD terror təşkilatının əlindən əvvəlcə İdlibə, daha sonra terrordan azad edilən bölgələrə köçüblər.
“Fevralın 6-da baş verən zəlzələlər zamanı mən, həyat yoldaşım və uşaqlarımla binanı tərk etdik, ancaq Afranın ana-atasının qaldığı bina uçdu. Bir dostumla inşaat cihazı götürüb dağıntı yerinə getdik. Xilasetmə işləri zamanı ilk olaraq körpənin anasının ayaqlarını gördük. Tavan onun üstünə çökmüşdü. Dağıntıları qazarkən səslər gəldi, əmimin oğlu (Afranın atası) olduğunu düşündüm. Qazmağa davam etdikcə körpə olduğunu gördüm”, – deyə o, olanları xatırlayıb.
Sevadi bundan sonra dağıntılar altından körpənin göbək bağını kəsib və xəstəxanaya aparıb.
Afranın hazırda sağlamlıq vəziyyəti yaxşıdır.
“O, mənə atasından bir xatirədir. Bütün ailəsi həyatını itirib. Biz onun mərhum atası ilə qardaşdan daha yaxın idik. O getdi, əmanəti qaldı”, – deyə Sevadi bildirib.
Mənbə: Anadolu “Agentliyi”
Xeberal.az
