Rusiya Dövlət Geoloji Kəşfiyyat Universitetində “Neft-qaz sənayesinin formalaşması və inkişafı – Rusiya və Azərbaycan alim və mütəxəssislərinin töhfəsi” mövzusunda beynəlxalq elmi konfrans keçirilib.
Konfrans Rusiya Elmlər Akademiyasının Neft, qaz və kömür yataqlarının geologiyası və işlənməsi problemləri üzrə Elmi Şurasının himayəsi altında baş tutub.
Bu barədə Moskva Azərbaycanlılarının Milli-Mədəni Muxtariyyətinin (MMM) mətbuat xidmətindən məlumat verilib.
Tədbirin təşkilatçıları qismində S.Orconikidze adına Rusiya Dövlət Geoloji Kəşfiyyat Universiteti, Rusiya Elmlər Akademiyasının Neft və Qaz Problemləri İnstitutu, Azərbaycan Elm və Təhsil Nazirliyinin Neft və Qaz İnstitutu və Moskva Azərbaycanlılarının Milli-Mədəni Muxtariyyəti çıxış ediblər.
Təşkilat Komitəsinin sədri Rusiya Elmlər Akademiyasının akademiki Anatoli Nikolayeviç Dmitriyevski, həmsədrlər Rusiya Dövlət Geoloji Kəşfiyyat Universitetinin rektoru Yuri Petroviç Panov, Rusiya Dövlət Geoloji Kəşfiyyat Universitetinin kafedra müdiri, professor Vaqif Yunusoviç Kərimov olublar.
Rəyasət Heyətində Yuri Petroviç Panov, Vaqif Yunusoviç Kərimov, Neft və Qaz Problemləri İnstitutunun direktoru, professor Ernest Sumbatoviç Zakirov, AMEA-nın vitse-prezidenti, akademik İbrahim Saidoviç Quliyev, Moskvadakı Azərbaycan diasporunun rəhbəri Bəxtiyar Həsənov iştirak ediblər.
Tədbirə Rusiyanın (Moskva, Ufa, Tümen) və Azərbaycanın aparıcı neft-qaz institutlarının, universitetlərinin alimləri, mütəxəssisləri, tanınmış ictimai xadimlər, eləcə də tələbələr qatılıblar.
Bakı böyük nümayəndə heyəti ilə təmsil olunub ki, heyətə AMEA-nın vitse-prezidenti, akademik İbrahim Saidoviç Quliyev, Neft və Qaz İnstitutunun direktoru, akademik Fəxrəddin Əbülfət oğlu Qədirov, Neft və Qaz İnstitutunun direktor müavini, professor Vaqif Şıxı oğlu Qurbanov, həmçinin Azərbaycan Dövlət Neft və Sənaye Universitetinin və “Neft, qaz və kimyanın geotexnoloji problemləri” Elmi-Tədqiqat İnstitutunun əməkdaşları daxil olublar.
Çıxış edənlərin təqdimatlarında Rusiya və Azərbaycan alimlərinin geologiya sahəsində, quruda və dənizdə neft-qaz yataqlarının kəşfiyyatı, işlənməsi, qazılması, o cümlədən emalı və nəqli, neft mühəndisliyi sahəsində birgə işləri, alim və mütəxəssislərin (azərbaycanlılar və azərbaycanəsillilər) SSRİ və Rusiyanın yanacaq-energetika kompleksinin inkişafına verdiyi töhfələr hərtərəfli nəzərdən keçirilib; ilk neftçi və geoloqlar haqqında tarixi faktlar S.A.Oruceva, F.K.Salmanova, E.İ.Tağıyeva, A.A.Mirzədcanzadə, N.K.Baybakova, V.Q.Şuxova kimi həmkarları, tələbələri, davamçıları və tədqiqatçılarının xatirələri vasitəsilə canlandırılıb.
Bundan əlavə, həm Azərbaycanda, həm də Rusiyada təhsil, səhiyyə, din və rifah sahələrində xeyriyyə layihələri həyata keçirmiş azərbaycanlı neft sənayeçilərinin və xeyriyyəçilərinin töhfələri qeyd olunub.
Azərbaycan xalqının ümummilli lideri Heydər Əliyevin fotoşəklinin olduğu və “Rusiya ilə Azərbaycan arasında münasibətlər daha yaxşı, daha geniş və səmərəli olmalıdır” sitatının yazıldığı banner, həmçinin rəssam K.A.Nikitin tərəfindən çəkilmiş Fərman Salmanovun portreti xüsusi maraq doğurub.
Fasilə zamanı “Qarabağ” ansamblının peşəkarlarının “Azərbaycan” rəqs nömrəsi ilə füsunkar çıxışı nümayiş etdirilib.
Xeberal.az
