“Hamımızın vaxta ehtiyacı var. Bir-iki gündən sonra beş il birlikdə oynadığımız kimi oynamaq mümkün deyil”.
Bu sözləri Oxu.Az-a müsahibəsində “Neftçi”nin futbolçusu Filip Ozobiç deyib.
UEFA Avropa Konfrans Liqasının III təsnifat mərhələsinin cavab oyununda Türkiyənin “Beşiktaş” klubuna məğlub olaraq (1:2, ilk oyun – 1:3) mübarizəni dayandıran “ağ-qaralar”ın yarımmüdafiəçisi həm bu görüş, həm də ümumən mövsüm barədə sualları cavablandırıb.
Müsahibəni təqdim edirik.
– İlk yarıdan sonra qalib gəlirdiniz, daha sonra nə baş verdi?
– Bəli, ilk hissədə qalib gəlirdik. Sıx qrafikdə oynayırıq. Ola bilər ki, rəqib ikinci yarıda daha gümrah idi. Onların keyfiyyətli futbolçuları var.
– Rəqibin heyətində əvəzetmələr oyuna nə qədər təsir etdi?
– Ola bilər ki, biz bir az yorğun idik. Amma Vinsent Abubakar kimi futbolçu meydana daxil oldu. Onun necə hücumçu olduğunu hamımız bilirik. Hesabı bərabərləşdirdi. Ondan sonra daha çətin oldu.
– Fasiləyə üstün yollandığınıza görə yəqin ki, daha inamlı idiniz. Baş məşqçi Adrian Mutu sizə nələr söylədi, hansı emosiyalar var idi?
– Əsas o idi ki, ilk 15 dəqiqə dözək və rəqib bizə çox təzyiq etməsin. Amma belə alındı.
– Öz oyununuzdan razı qaldınız?
– Öz oyunum barədə danışmaq istəmirəm. Kənardan baxanlar nə isə deyə bilər.
– Oyundan sonra mətbuat konfransında Şenol Güneşdən “Neftçi”dən hansı futbolçunu bəyəndiyini soruşdular, o, sizin adınızı çəkdi. Amma bildirdi ki, bu görüşdə nə isə alınmadı sizdə.
– Futboldur da, olur. Rəqibin qapısından uzaq olanda çətin olur. “Beşiktaş” bizə çox təzyiq etdi. Belə də, müdafiədə çox işlədik. Güc itirdik.
– “Neftçi” üçün avrokubokda mövsümü başa çatdı. İndi hər kəs komandanın çempionatda nə edəcəyini gözləyir. “Kəpəz” və “Səbail”lə matçda qələbə qazana bilməmisiniz. Daha güclü “Neftçi” görəcəyik? Çempionluq mübarizəsində olacaqsınız?
– Əlbəttə. Sadəcə, bizə zaman lazımdır. Baş məşqçi də toplanışa sonradan gəldi. Məncə, hamımızın vaxta ehtiyacı var. Bir-iki gündən sonra beş il birlikdə oynadığımız kimi oynamaq mümkün deyil. Hər şeyə zaman lazımdır. Hər gün işləyirik ki, daha yaxşı olaq. Yaxın vaxtlarda hər şey dəqiqləşəcək.
– Sabiq komandanız “Qarabağ”a qarşı oyunlarda hansı emosiyalarınız olacaq?
– Hələ bu oyunlara var. Orada hamı mənim dostumdur. Lakin indi “Neftçi”də oynayıram və istəyirəm ki, “Neftçi” yaxşı olsun. Hər şeyi edəcəyəm ki, komandam qalib gəlsin.
Faiq Tahirov
Xeberal.az