“Beynəlxalq hüquq nöqteyi-nəzərindən Ermənistan qeyri-qanuni olaraq SSRİ-dən çıxıb. Belə ki, o proseduru başa çatdırmayıb”.
Bu sözləri Rusiya Dövlət Dumasının deputatı Yevgeni Fyodorov deyib.
Onun sözlərinə görə, bu səbəbdən də İrəvanın Moskvanın müttəfiqi hesab olunması üçün heç bir hüquqi əsası yoxdur.
“Beynəlxalq hüquq nöqteyi-nəzərindən Ermənistan SSRİ-dən çıxmayıb, deməli, Sovet dövlətinin hüquqi varisi kimi Rusiyadan da ayrılmayıb. Bu səbəbdən də Moskva və İrəvan münasibətlərini bu statusa əsaslanaraq davam etdirməlidirlər. Ermənistan müstəqil olmalıdır, lakin nəzərə alınmalıdır ki, bu ərazi beynəlxalq hüquq baxımından mübahisəli ərazidir”, – deyə Fyodorov qeyd edib.
Onun sözlərinə görə, 1991-ci ildən aydın idi ki, Ermənistan “NATO ilə flört edəcək”, çünki istənilən qanun pozuntusu münaqişəyə gətirib çıxarır.
Daha əvvəl Ermənistan Müdafiə Nazirliyindən bildirildiyinə görə, 2023-cü ildə ölkə ABŞ qoşunlarının Avropadakı komandanlığı tərəfindən təşkil edilən iki hərbi təlimdə iştirak edəcək ki, bu təlimlər NATO-nun Kosovo və Metoxiyadakı beynəlxalq missiyasının qüvvələri və “Saber Junction” qüvvələri tərəfindən təşkil olunacaq.
Buna cavab olaraq Moskva Ermənistan hakimiyyətini ölkənin NATO ilə birgə təlimlərdə gözlənilən iştirakına dair məsələyə aydınlıq gətirməyə çağırıb. Rusiya Xarici İşlər Nazirliyinin rəsmi nümayəndəsi Mariya Zaxarovanın sözlərinə görə, İrəvanın öz ərazisində KTMT xətti üzrə manevrlər həyata keçirilməsindən imtina etməsi təəssüf doğurur və regional təhlükəsizliyin gücləndirilməsinə töhfə vermir.
Mənbə: NEWS.ru
Xeberal.az
