Azərbaycanda lazımi kadrların tapılmaması hallarına rast gəlinir.
“Report” xəbər verir ki, bunu Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin İdarə Heyətinin sədri Mustafa Abbasbəyli bu gün Bakıda keçirilən 1-ci Yerli İstehsalat və İstehsal Texnologiyaları Sərgisində bildirib.
“Əsas məşğulluq tədbirimiz peşə hazırlığıdır. Bu məsələdə də əsas prioritet istiqamətlərindən məhz istehsalla məşğul olan sahibkarlarımızın tələbələrinə cavab verən peşə sahiblərinin hazırlanmasıdır. Bu ilin 10 ayında 9 235 nəfər peşə hazırlığı keçib”, – deyə o qeyd edib.
M.Abbasbəylinin sözlərinə görə, agentlik gələn il işəgötürənlərlə əməkdaşlığı daha da genişləndirəcək.
1-ci Yerli İstehsalat və İstehsal Texnologiyaları Sərgisi Bakı İdman Sarayında işə başlayıb. Sərginin əsas məqsədi yerli məhsulların geniş istehlakçı auditoriyasına tanıdılması, yerli brendlərin istehsal texnologiyaları barədə alıcıları məlumatlandırmaq, alıcılar və satıcılar arasında əlaqələrin qurulması və inkişaf etdirilməsi, yerli məhsulların ixracı sahəsində əməkdaşlığın genişləndirilməsidir.
Xeberal.az
