Azərbaycandan Türkiyəyə göndərilən iki TIR humanitar yardım Kahramanmaraş bölgəsinə çatıb.
Bu barədə Diasporla İş üzrə Dövlət Komitəsi məlumat yayıb.
Yardımın təqdimetmə mərasimində iştirak etmək üçün Diasporla İş üzrə Dövlət Komitəsi sədrinin I müavini Valeh Hacıyev, ADDF-nin icraçı direktoru Əkrəm Abdullayev və içraçı direktorun müavini Şahin Camalov Kahramanmaraşa səfər ediblər. İçərisində yorğan, adyal, kondisioner, isidici və yemək bişirmək üçün sobalardan ibarət olan iki TIR Kahramanmaraş rayon Afet ve Acil Durum (AFAD) Müdürlüyünə təqdim olunub.
Səfər çərçivəsində AFAD başqan yardımcısı Hamza Taşdelen, Kahramanmaraş valisinin müavini Emre Cebeci, AFAD Kahramanmaraş il müdiri Tayfun Temur, müdirliyin əməkdaşları və zəlzələdən əziyyət çəkmiş yerli sakinlərlə görüş keçirilib.
Tədbiri giriş sözü ilə açan AFAD başqan yardımcısı Hamza Taşdelen Azərbaycan dövlətinin zəlzələdən dərhal sonra ilk yardıma gələn dövlətlərdən olduğunu vurğulayıb. O, Azərbaycan Prezidenti İlham Əliyevin, Birinci vitse-prezident Mehriban xanım Əliyevanın hər zaman Türkiyə xalqının yanında olduğunu qeyd edib və göndərilən yardımlar haqqında məlumat verib. Türkiyə Cümhuriyyətinin köməyinə ilk gəlib çatan və son tərk edən xilasedicilərin də məhz Azərbaycandan olduğunu qürur hissi ilə qeyd edən H.Taşdelen Azərbaycan xalqına və ölkə rəhbərliyinə öz təşəkkürünü bildirib.
Diasporla İş Üzrə Dövlət Komitəsi sədrinin I müavini Valeh Hacıyev bildirib ki, yardım kampaniyaları Azərbaycan Respublikasının Prezidenti İlham Əliyevin və Birinci vitse-prezident Mehriban Əliyevanın tapşırıqlarının icrası istiqamətində görülən işlərin bir hissəsidir. Bu sahədə fəaliyyət göstərən bütün dövlət qurumları, o cümlədən Diasporla İş üzrə Dövlət Komitəsi Türkiyənin yanında olmaqda davam edəcək.
Xatırladaq ki, Azərbaycan hökumətinin dəstəyi ilə ADDF cari ilin aprel ayında Türkiyə-Azərbaycan Dərnəkləri Federasiyası ilə birlikdə Kahramanmaraşda zəlzələdən zərər çəkmiş 2 600-dən çox ailəyə ərzaq yardımı, avqust ayında isə yeni tədris ilinin başlanması ilə əlaqədar olaraq Hatay və ətraf bölgələrdə 1-ci sinfə gedəcək şagirdlərə dəstək üçün 3000 məktəbli dəstindən ibarət humanitar yardım göndərib.
ADDF tərəfindən göndərilən yardımlar Azərbaycan Respublikasının Prezidenti cənab İlham Əliyevin tapşırığına uyğun olaraq, Türkiyə Respublikasında baş vermiş güclü zəlzələnin fəsadlarının aradan qaldırılması, zəlzələdən zərərçəkənlərin həyatlarının yüngülləşdirilməsi və ehtiyaclarının ödənilməsi məqsədilə dövlətimizin həyata keçirdiyi uzunmüddətli kampaniyanın tərkib hissəsidir.
Xeberal.az
