Füzuli rayonundan məcburi köçkün olan Sumqayıt Dövlət Dram Teatrının aktyoru Habil Xanlarov kömək istəyir.
1993-cü ildən Füzuli rayonundan məcburi köçkün olan, 2005-ci ildən bu günə kimi Sumqayıt Dövlət Dram teatrında aktyor işləyən,100-dən çox tamaşalarda baş rolu canlandıran Habil Tehran oğlu Xanlarov Azərbaycanda ona qarşı olunan haqsızlıqlardan artıq cana doyubdur.
Ümid Televiziyasına müraciət edən aktyor bildirir ki, Füzuli rayonundan məcburi köçkün kimi Sumqayıt şəhəri 6-cı mikrayon, 27 saylı orta məktəbin həyətində istismar müddətini çoxdan başa vurmuş, sözügedən məktəbin yardımçı binasının rütubətsiz bir otağında 7 nəfər ailə üzvi ilə bu günə kimi yaşayır.
Bu cür şəraitsiz yerdə yaşayan Habil Xanlarov qeyd edir ki, “Qış aylarında yağan yağış suları otağa dolur. Otağın döşəməsində çürümə, divarlarında çatlar əmələ gəlib.Ailəm təhlükə altında yaşayır.Bu cür rütubətli, dar bir otaqda yaşamaqdan xəstəlik tapmışıq ”.
Dövlət başçısının sərəncamına əsasən qaçqın və məcburi köçünlərin şəraitinin yaxşılaşdırılması üçün tikintisi nəzərdə tutulmuş fərdi yaşayış evlərində onun adı da siyahıya salınsa da, evlər hazır olan zaman evlə təmin edilməyib.Ona söz verən adamlar sözlərinin üstündə durmayaraq, bildiriblər ki, bizdən əlini üz, bizlik deyil.
Əlacsız qalan aktyor 2019-cu ilin iyununda Qaçqınların və Məcburi Köçkünlərin işləri üzrə Dövlət Komitəsinin Sumqayıt şəhər komissiyasına müraciət edib.Komitədən aktyora bildirilib ki, qeydiyyatı doğulduğu Füzuli rayonun işğaldan azad olunmuş Babi kəndində olduğu üçün adında əgər ev və yaşayış sahəsi varsa Sumqayıt şəhərində qaçqın və məcburi köçünlər üçün inşa edilmiş evlərdə mənzillə təmin edilə bilməz.
Haqqını tələb etməyə çalışan aktyor adında heç bir mülkün olmadığını təsdiq edən sənədi 01.10.2018-ci il tarixində Füzuli Rayon İcra hakimiyyətindən əldə edərək, yenidən Qaçqınların və Məcburi Köçkünlərin işləri üzrə Dövlət Komitəsinin Sumqayıt şəhər komissiyasına müraciət edib. Komissiyadan bildirilib ki, həqiqətəndə onun adında ev və həyətyanı sahəsi olmadığı üçün Sumqayıt şəhərində Qaçqınlar və Məcburi Köçkünlər üçün inşa edilmiş evlərdə mənzillə təmin olunaraq məskunlaşmalıdır.
Aktyor bildirir ki, növbəti müraciətindən bu günə kimi ev problemi hələ də müsbət həllini tapmayıb.Ümidini Sumqayıt şəhərinin 70 illik yubileyinə bağlasa da, baş tutan yubileydə Qaçqınların və Məcburi Köçkünlərin işləri üzrə Dövlət Komitəsi və Sumqayıt şəhər icra hakimiyyəti tərəfindən aktyorun mənzil problemi həll olunmayıb.
Aktyor Habil Xanlarov Dövlət Başçısına, Azərbaycan Respublikasının birinci vitse prezidenti Mehriban Əliyevaya məktub ünvanlasa da müəyyən qurumlar tərəfindən aktyoru səsinə hələ də səs verən yoxdur.
Bu bir həqiqətdir ki, dövlət başçısının mədəniyyət və incəsənət xadimlərinə, teatrlara göstərdiyi diqqət və qayğı hər zaman göz önündə olubdur. Buna sübut olaraq onu qeyd etmək olar ki, bu il martın 1-də Mədəniyyət və İncəsənət xadimlərinin bir qrup ilə görüşü zamanı prezident İlham Əliyev Mədəniyyət və İncəsənət xadimlərinin əmək haqlarının artırılması və mənzil şəraiti olmayan şəxslərin mənzillə təmin edilməsi ilə bağlı müəyyən qurumlara öz göstəriş və tapşırığını vermişdir. Buna baxmayaraq bu problemlər hələ də öz müsbət həllini tapmayıbdır.
İnanırıq ki, Füzuli rayonundan məcburi köçkün olan aktyor Habil Xanlarovun mənzil problemi tezliklə öz müsbət həllini tapacaq.Unutmayaq ki, hər bir dövlət məmurunun qarşısında duran əsas vəzifə borcu xalqa xidmət etməkdir.
XəbərAl.az olaraq qarşı tərəfin mövqeyini öyrənməyə hazırıq.Mövzuya yenidən qayıdacağıq.