Bakının daşnak-bolşevik işğalından azad edilməsinin 105-ci ildönümüdür
Müasir Müsavat Partiyasının (MMP) rəhbərliyi və üzvləri Bakının daşnak-bolşevik işğalından azad edilməsinin 105-ci ildönümü münasibətilə 1918-ci ildə Bakının azad edilməsi uğrunda döyüşlərdə həlak olmuş şəhid türk əsgərlərinin xatirəsinə ucaldılmış “Türk şəhidliyi” abidəsini ziyarət edib, önünə tər güllər qoyublar.
Xəbəral.az xəbər verir ki, bu barədə MMP-nin Mətbuat Xidmətinin məlumatında bildirilib.
Ziyarət zamanı abidənin önündə Azərbaycan tarixinin şərəfli günündən danışılıb, 15 sentyabrın 1918-ci ilinə virtual ekskursiya edilib. Bakının işğaldan azad edilməsi zamanı Osmanlı ordusunun 1130 şəhid verdiyindən söz edilərək, bunun Azərbaycan-Türkiyə qardaşlığının tarixi nümunəsi olduğu qeyd edilib. Vurğulanıb ki, Azərbaycan ilə Türkiyə arasındakı qardaşlıq əlaqələri 44 günlük Vətən müharibəsində özünü bir daha göstərib.
Qeyd edək ki, Sentyabrın 15-i Bakının işğaldan azad olunduğu gündür. 1918-ci il sentyabrın 15-də Nuru Paşanın rəhbərlik etdiyi Qafqaz İslam Ordusu və Azərbaycan Korpusu Bakıya daxil olaraq şəhəri erməni-bolşevik işğalından azad edib. Beləliklə, həm Azərbaycanın müstəqilliyi təmin olunmuş, həm də ermənilərin və bolşeviklərin Bakı və ətraf rayonlardakı ağalığına son qoyulub.
Xəbəral.az
