Ali Baş Komandan İlham Əliyevin Azərbaycan Respublikasının Prezidenti seçilməsinin 20 illiyi ilə əlaqədar Əlahiddə Ümumqoşun Ordunun (ƏÜO) xüsusi təyinatlıları Qapıcıq zirvəsinə yürüş ediblər.
Bu barədə Müdafiə Nazirliyi məlumat yayıb.
“Ölkə başçısı İlham Əliyev 20 il bundan öncə 2003-cü ildə ilk dəfə Prezident vəzifəsinə seçilən zaman Azərbaycan xalqına müraciət edərək bildirib ki, nəyin bahasına olursa-olsun, biz öz tarixi torpaqlarımızı düşmənin əlindən alacağıq. İstər sülh yolu ilə, istər müharibə yolu ilə və belə də olub. Sözü imzası qədər dəyərli olan İlham Əliyevin siyasi iradəsi və sərkərdəliyi, ordumuzun rəşadəti, xalqımızın birliyi nəticəsində 30 illik işğala son qoyulub. Müharibədə qazanılan möhtəşəm Zəfər tariximizə qızıl hərflərlə yazılıb.
ƏÜO-nun şəxsi heyəti “Biz qəhrəman əsgər və zabitlərimiz hesabına qələbə qazanmışıq”, – deyən İlham Əliyevin Prezident seçilməsinin 20-ci ildönümünü bayram əhvali-ruhiyyəsi ilə qeyd edir və onun Ali Baş Komandanlığı altında xidmət etmək şərəfinin yaratdığı qürur hisslərini nümayiş etdiririk”, – deyə nazirlikdən bildirilib.
ƏÜO-da Ali Baş Komandan İlham Əliyevin Azərbaycan Respublikasının Prezidenti seçilməsinin 20 illiyi ilə əlaqədar keçirilən silsilə tədbirlərin davamı olaraq xüsusi təyinatlılarımız Naxçıvan Muxtar Respublikasının ən hündür nöqtəsi olan Qapıcıq zirvəsinə yürüş ediblər.
Çətin dağ aşırımlarından keçərək Ordubad rayonu ərazisində yerləşən və hündürlüyü 3905 metr olan Qapıcıq zirvəsinə qalxan xüsusi təyinatlılar Azərbaycan Respublikasının Prezidenti, Müzəffər Ali Baş Komandan İlham Əliyevin Vətənə, xalqa və dövlətçiliyə misilsiz xidmətinin 20 ilini tərənnüm edən və üzərinə dəmir yumruğun əks olunduğu lövhəni qaya üzərində bərkidiblər.
Xeberal.az
