Türkiyənin Antalya şəhərində qeyri-adi tapıntı hər kəsin marağına səbəb olub. Belə ki, Hacettepe Universiteti Mağara Araşdırma Cəmiyyəti (HÜMAK) İbradı rayonunun Hökez məhəlləsində yerləşən mağarada yerli istehsal olan “Murat 124” markalı avtomobil aşkar edib.
Məsələ burasındadır ki, yerli əhali tərəfindən çuxur kimi tanınan mağaraya girmək üçün təxminən 50 metr şaquli eniş etmək lazımdır.
Elm adamlarının sözlərinə görə, indiyədək mağaralarda çoxlu müxtəlif formasiyalar görüblər, lakin avtomobil onlar üçün əsl sürpriz olub.
“Qrupumuzda mağaraya enən bütün dostlar həyəcanlandı. İçərisində gördüyümüz avtomobilə görə, bu mağaraya “Arabalı” adını verdik”, – deyə HÜMAK rəhbəri Ahmet Öztürk bildirib.
Onun sözlərinə görə, mağaranın şaquli hissəsi təxminən 40-50 metrdir, xəritələmə işləri davam etdiyi üçün üfüqi hissənin dərinliyi tam olaraq çıxarılmayıb.
Cəmiyyətin üzvlərindən olan Ali Gazioğlu da təəssüratlarını bölüşüb:
“Bu mağara əsas yoldan təxminən 200 metr aralıdadır. Dağlıq və daşlıq ərazidir. Mağaraya enəndə qəribə bir şeylə qarşılaşdım. Aşağı düşəndə “Murat 124” markalı avtomobili gördüm. Maşın yaşıl rəngdədir. Bu, həyatımda gördüyüm ən gözəl hadisədir. Həqiqətən çox həyəcanlandım. Bu hekayəni ömrümün sonuna qədər hamıya danışacağam. Nəqliyyat vasitəsi tamamilə köhnəlib. Buraya düşməsindən təxminən 25-30 il keçib. Mağaranın şaquli uzunluğu 40-50 metr civarındadır. Nəqliyyat vasitəsi yuxarıdan düşən daşlar nəticəsində tamamilə əzilib”, – deyə o bildirib.
Mənbə: Haber Global
Xeberal.az
