Ali Məhkəmədə Masallıda bir neçə il əvvəl qətl törətməkdə təqsirləndirilən Şəhriyar Tapdıqovun barəsindəki hökmdən verilən kassasiya şikayəti üzrə məhkəmə iclası başlayıb.
Pravda.az-ın əldə etdiyi məlumata görə, hakim Hafiz Nəsibovun sədrliyi ilə keçiriləcək prosesdə təqsirləndirilən şəxslərin anket məlumatları dəqiqləşdirilib.
Məhkəmənin növbəti iclası noyabrın 24-nə təyin edilib.
Lənkəran Ağır Cinayətlər Məhkəməsinin hökmü ilə o, 18 il müddətinə azadlıqdan məhrum edilib. Şirvan Apellyasiya Məhkəməsi onun şikayətini təmin etməyib.
Qeyd edək ki, 4 sentyabr 2020-ci ildə saat 10 radələrində Masallı rayonunun Hüseynhacılı kəndinin ərazisində 2 aprel 1962-ci il təvəllüdlü Şəmmədova Aidə Ağadadaş qızının yaşadığı evdə başına küt alətlə vurularaq qətlə yetirilməsi faktı ilə bağlı Baş Prokurorluğun İstintaq İdarəsində Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Lakin cinayəti törətmiş şəxsin müəyyən edilməsi mümkün olmayıb. Peşəkar prokurorluq və polis əməkdaşlarından ibarət olan istintaq-əməliyyat qrupu tərəfindən həyata keçirilmiş kompleks istintaq hərəkətləri və əməliyyat axtarış tədbirləri ilə zərərçəkmişin həmkəndlisi 5 may 1992-ci il təvəllüdlü Şəhriyar Əliyar oğlu Tapdıqovun 4 sentyabr 2020-ci ildə Aidə Şəmmədovanın yaşadığı evə tamah niyyəti ilə daxil olaraq sonuncunu qəsdən öldürməsinə əsaslı şübhələr müəyyən edilib. 29 yanvar 2022-ci ildə Şəhriyar Tapdıqov şübhəli şəxs qismində tutulub. Sonuncu istintaqa verdiyi ifadəsində törətdiyi cinayət əməlini etiraf etməklə cinayətin alətini təqdim edib.
İttihama görə, Şəhriyar Tapdıqov Aidə Şəmmədovanın evinə oğurluğa girib. Bu zaman onlar üzbəüz gəliblər. Qadın onu tanıdığı üçün qışqırıb. Daha sonra Şəhriyar onu qəsdən öldürmək qərarına gəlib. O, bu məqsədlə Aidənin sifət nahiyəsinə sağ əli ilə yumruq vurub səs-küy salmasının qarşısını alıb, arxa tərəfinə keçib qolları və boynundan tutub. Şəhriyar qadını üzüstə yerə yıxıb. O, Aidənin ayağa qalxmaq istədiyini görüb baş nahiyəsinə təpiklə vurub, evə giriş qapısının yanından götürdüyü dəmir linglə yerdə uzanıqlı vəziyyətdə olmuş qadının baş nahiyəsinin arxa hissəsinə azı dörd dəfə qəsdən zərbələr endirib. Nəticədə o, Aidəni qətlə yetirib.
Xeberal.az
