Şəmkir Rayon Polis Şöbəsinin Kür Polis Bölməsinin əməkdaşlarının keçirdikləri əməliyyat-axtarış tədbirləri nəticəsində rayonun Kür qəsəbəsindəki fərdi yaşayış evlərindən və avtomobildən silsilə oğurluqlar etməklə zərərçəkmişlərə xeyli miqdarda maddi ziyan vuran şəxslər saxlanılıblar.
Daxili İşlər Nazirliyinin mətbuat xidmətinin Gəncə regional qrupundan verilən məlumata görə, rayon sakinləri Şəhriyar Muradov, qardaşı Cəsarət Muradov, İmamqulu Məmmədov, Rəsul Məmmədov, Musaməddin Namazov, Sənan Məmmədli və Ruslan İsmayılov cari ilin müxtəlif vaxtlarında vətəndaşlara məxsus mağaza, fərdi yaşayış evləri və avtomobillərə qanunsuz yolla daxil olaraq oradan müxtəlif əşyaları oğurlayaraq satmış, əldə etdikləri pulu öz aralarında bölüblər.
Oxu.Az-ın əldə etdiyi məlumata görə, dindirilmə zamanı oğrulardan biri törətdikləri əməli etiraf edən zaman evdə bahalı arağı da oğurlayıb içdiklərini bildirib.
Şübhəli şəxslərdən 6 nəfəri maddi sübutların böyük əksəriyyəti ilə birlikdə saxlanılaraq istintaqa təhvil verilib. Hazırda dəstənin digər üzvü Sənan Məmmədlinin yerinin müəyyən olunaraq saxlanılması istiqamətində zəruri istintaq-əməliyyat tədbirləri davam etdirilir. Faktla bağlı Şəmkir Rayon Polis Şöbəsində cinayət işi başlanılıb, araşdırmalar davam etdirilir.
Xeberal.az
