“Neftçi” Peşəkar Futbol Klubunun (PFK) Müşahidə Şurasının sədri Rövşən Nəcəf baş icraçı direktor Fərrux Mahmudov və baş məşqçi Adrian Mutu ilə birgə mətbuat konfransı keçirib.
“Neftçi” Peşəkar Futbol Klubundan verilən məlumata görə, Rövşən Nəcəf Azərbaycan futbolunun flaqmanı hesab olunan, zəngin ənənələr malik “Neftçi” klubunun qarşısına qoyulan hədəflərdən danışaraq, azarkeşlərin gözləntilərini doğrultmağın vacibliyini qeyd edib, onların davamlı dəstəklərinin klub üçün önəmini vurğulayıb.
Müşahidə Şurasının sədri “Neftçi” PFK-da islahatların uğurla davam etdirildiyini və klub üçün yeni dövrün başlandığını diqqətə çatdırıb.
Son vaxtlar klubun futbol meydanlarında uğursuz nəticələr əldə etdiyini təəssüflə bildirən R.Nəcəf “Neftçi” PFK-nın Müşahidə Şurasının vəziyyəti ciddi təhlil edərək, qısa, orta və uzun müddətli tədbirlər paketindən ibarət islahatlar konsepsiyası hazırladığını deyib. Rövşən Nəcəf əsas məqsədin “Neftçi” PFK-nı müasir Avropa futbol klubunun strukturuna malik komandaya çevirmək olduğunu vurğulayıb.
Artıq “Neftçi” PFK-nın yeni strukturunun formalaşdırıldığını söyləyən Müşahidə Şurasının sədri, həmçinin uşaq futbolunun inkişafına xüsusi önəm veriləcəyini diqqətə çatdırıb. O, yüksək standartlara cavab verən futbol Akademiyasının yaradılması, eyni zamanda, peşəkar, səmərəli skaut sisteminin formalaşdırılması istiqamətində də zəruri işlərin görüləcəyini bildirib.
Avropa futbolunda böyük təcrübəyə malik Adrian Mutunun baş məşqçi təyin edilməsinin klubun hədəflərinə uyğun olduğunu söyləyən R.Nəcəf onunla birgə klubun qarşıya qoyulan məqsədlərə çatacağına inandığını qeyd edib.
Fərrux Mahmudov “Neftçi” PFK-nın baş icraçı direktoru təyin olunmasından qürur hissi keçirdiyini bildirib. O, klubun gələcək uğurlu fəaliyyəti istiqamətində səylə çalışacağını deyib, mütəmadi olaraq KİV nümayəndələri və azarkeşlərlə müxtəlif formatlarda görüşlər təşkil olunacağını bildirib.
Baş məşqçi Adrian Mutu “Neftçi” PFK kimi böyük ənənələrə malik klubda işləməkdən şərəf hissi duyduğunu və işinə böyük məsuliyyətlə yanaşdığını söyləyib. Klubun hazırki vəziyyəti barədə məlumat verən A.Mutu azarkeşlərin etimadını doğrulmaq üçün əzmlə çalışacaqlarını deyib.
Xeberal.az
