Azərbaycan millisinin AVRO-2024-ün seçmə mərhələsində rəqiblərinin adına aydınlıq gəlib.
Oxu.Az xəbər verir ki, Almaniyanın Frankfurt şəhərində baş tutan püşkatma mərasiminin nəticələrinə görə Azərbaycan yığması F qrupunda mübarizə aparacaq.
Püşkatmaya 4-cü səbətdən qatılan milli komandamızın bu qrupdakı rəqibləri Belçika, İsveç, Avstriya və Estoniya seçmələri olacaq.
Qrupdakı komandaların hamısı millimiz üçün tanış rəqiblərdir. Azərbaycan yığma komandası müstəqillik tariximiz ərzində bu rəqiblərin hər biri ilə müxtəlif sferalarda bir neçə dəfə üz-üzə gəlib.
Püşkə birinci səbətdən qatılan, FIFA-nın son açıqlanan reytinq siyahısında ikinci sırada qərarlaşan və F qrupunun əsas favoriti hesab olunan Belçika yığması ilə milli səviyyəsində ümumilikdə 4 dəfə üz-üzə gəlmişik. Bunlardan ikisi 2008-ci il, digər ikisi isə 2012-ci il Avropa Çempionatının seçmə mərhələsi oyunlarına təsadüf edib.
Belçika milli komandası ilə ilk qarşılaşmamız 2006-cı il oktyabrın 11-də Brüsseldə baş tutub. Sözügedən matç meydan sahiblərinin 3:0 hesablı qələbəsi ilə yekunlaşıb. Həmin tsiklin cavab oyununda Bakıda üz-üzə gələn rəqiblərin duelində bu dəfə də sevinən tərəf belçikalılar olub. Qonaqlar minimalhesablı qələbə qazanıblar.
“Qırmızı şeytanlar” ləqəbli Belçika yığması ilə üçüncü dəfə 2011-ci il martin 29-da qarşılaşmışıq. Yığmamızın 1:4 hesablı məğlubiyyəti ilə başa çatan qarşılaşmada yeganə qolumuzu Ruslan Abışov vurub. Həmin vaxt Berti Foqtsun rəhbərlik etdiyi Azərbaycan millisi bu qarşılaşmanın revanşında Bakıda rəqibindən xal ala bilib. 2011-ci il sentyabrın 2-də Tofiq Bəhramov adına Respublika Stadionunda keçirilən matç 1:1 hesablı bərabərliklə yekunlaşıb. Komandamızın qoluna Rauf Əliyev imza atıb. Qarşılaşmanın 87-ci dəqiqəsində vurulan bu qolla Bakıda iki xal itirən Belçika yığması AVRO-2012-yə gedə bilməmişdi.
İsveç millisi ilə isə cəmi bir tsikldə, iki oyunda rəqib olmuşuq. 2002-ci il dünya çempionatının seçmə mərhələsi çərçivəsində eyni qrupda yer alan Azərbaycan və İsveç yığmalarının hər iki oyununda isveçlilər qələbəyə sevinib. Rəqib Bakıdakı qarşılaşmada 1, Stokholmdakı matçda isə 3 qol vurub. Xatırladaq ki, İsveçdəki matçda qapımıza vurulan üç qoldan birinin müəllifi olan Zlatan İbrahimoviç bununla millidəki qol hesabını açmışdı.
Avstriya yığması da müstəqillik tariximizdə bir neçə dəfə üz-üzə gəldiyimiz rəqiblərdən biridir. Bu komanda ilə ümumilikdə 4 dəfə qarşılaşmışıq. Bu görüşlərdən ikisi 2006-cı il dünya çempionatının, digər ikisi isə 2012-ci il Avropa çempionatının seçmə mərhələsinə təsadüf edib. 2004-cü il sentyabrın 8-də Vyanada baş tutan görüşdə meydan sahibləri 2:0 hesablı qələbə qazanıblar. Həmin tsikl çərçivəsində Bakıdakı cavab görüşündə isə qalib müəyyənləşməyib. 2005-ci il 7 sentyabrda Bakıda baş tutan görüşdə 0:0 hesabı qeydə alınıb. Avstriya yığması rəqiblərin 2010-cu il 8 oktyabr tarixində Vyanada keçirilmiş üçüncü matçında 3:0, 2011-ci il 7 oktyabrda Bakıdakı görüşdə isə 4:1 hesablı qələbələrə sevinib. Sonuncu görüşdə millimizin yeganə qolunu Vüqar Nadirov vurub.
F qrupundakı rəqiblərimiz arasında ən çox üz-üzə gəldiyimiz komanda isə Estoniya yığmasıdır. Maraqlıdır ki, ümumilikdə 8 dəfə qarşılaşan Azərbaycan və Estoniya yığmaları heç vaxt rəsmi oyunlarda üz-üzə gəlməyiblər. İki komandanın bütün görüşləri beynəlxalq yoldaşlıq oyunları çərçivəsində baş tutub. 8 oyunun birində millimiz qalib gəlib, 4 qarşılaşma bərabərliklə yekunlaşıbsa, 3 matçda Estoniya yığması qələbəyə sevinib. Qolların nisbəti də rəqibin xeyrinədir – 8:5. Müxtəlif vaxtlarda Azərbaycan millisinin heyətində Ceyhun Sultanov, Xaqani Məmmədov, Qurban Qurbanov, Vyaçeslav Lıçkin və Rauf Əliyev Estoniya yığmasının qapısına yol tapmağı bacarıb.
Azərbaycan – Belçika
11.11.2006 Brüssel AÇSO Belçika – Azərbaycan 3:0
21.11.2007 Bakı AÇSO Azərbaycan – Belçika 0:1
29.03.2011 Brüssel AÇSO Belçika – Azərbaycan 4:1
02.09.2011 Bakı AÇSO Azərbaycan – Belçika 1:1
Azərbaycan – İsveç
02.09.2000 Bakı DÇSO Azərbaycan – İsveç 0:1
07.10.2001 Stokholm DÇSO İsveç – Azərbaycan 3:0
Azərbaycan – Avstriya
08.09.2004 Vyana DÇSO Avstriya – Azərbaycan 2:0
07.08.2005 Bakı DÇSO Azərbaycan – Avstriya 0:0
08.10.2010 Vyana AÇSO Avstriya – Azərbaycan 3:0
07.11.2011 Bakı AÇSO Azərbaycan – Avstriya 1:4
Azərbaycan – Estoniya
15.02.1996 Larnaka YO Estoniya – Azərbaycan 0:0
01.03.1997 Larnaka YO Azərbaycan – Estoniya 0:2
04.06.1997 Vilyandi YO Estoniya – Azərbaycan 1:0
16.05.1998 Vilyandi BT Estoniya – Azərbaycan 0:0
28.11.1998 Gəncə YO Azərbaycan – Estoniya 2:1
06.03.1999 Larnaka YO Azərbaycan – Estoniya 2:2
03.07.2002 Kuressaare YO Estoniya – Azərbaycan 0:0
15.11.2013 Tallin YO Estoniya – Azərbaycan 2:1
Xeberal.az
