Keçən həftə Meksikanın Kitodakı səfirliyinə basqından sonra saxlanılan Ekvadorun keçmiş vitse-prezidenti Xorxe Qlas həbsxanada intihara cəhd edib. O, koma vəziyyətindədir.
Bu barədə “Teleamazonas” telekanalı məlumat yayıb.
“Xorxe Qlas bazar ertəsi günortadan sonra Quayakildəki hərbi xəstəxanaya aparılıb. Keçmiş vitse-prezident təcili olaraq xəstəxanaya yerləşdirilib, o, süni koma vəziyyətindədir”, – deyə məlumatda bildirilir.
Telekanalın polis nümayəndəsinə istinadən verdiyi məlumata görə, Qlas həbsxanada külli miqdarda antidepressant və sakitləşdirici dərman qəbul edib, nəticədə dərman zəhərlənməsi diaqnozu qoyulub.
Xatırladaq ki, Ekvador polisi aprelin 6-na keçən gecə Meksikanın Kitodakı səfirliyinə zorla daxil olub. Hüquq-mühafizə orqanlarının əməkdaşları korrupsiyada təqsirli bilinən Ekvadorun keçmiş vitse-prezidenti Xorxe Qlası saxlayıblar. Daha sonra Prezident Daniel Noboanın administrasiyası Qlasın saxlanması ilə bağlı məlumatı təsdiqləyib və diplomatik nümayəndəliyə basqın edilməsini suverenliyin müdafiəsi adlandırıb. Ertəsi gün Ekvador XİN-dən bildirildi ki, Ekvadorun keçmiş vitse-prezidentinin qaçmaq təhlükəsi ciddi olduğundan səfirliyə basqın etmək qərara alınıb.
Buna qədər – martın 3-də Meksika Qlası Ekvadora təhvil verməkdən imtina etmişdi. Meksika XİN ölkəsinin sığınacaq axtaranları, xüsusən də ölkədə siyasi təqiblərə məruz qaldıqları hallarda həmişə qonaqpərvərliklə qəbul etdiyini bildirib.
Mənbə: İzvestiya
Xeberal.az
