“Atletiko Madrid”in qapıçısı Yan Oblak Lionel Messi və Kriştianu Ronaldunun İspaniya çempionatından getmələrindən danışıb.
Onun sözlərinə görə, Messi və Ronaldu olmadan çempionatda daha çox bərabərlik yaranıb.
“La Liqada indi əvvəlkindən daha çox bərabərlik təmin olunub. Bütün komandalar çox yaxşıdır və hər matç çox çətin keçir. La Liqada rəqabət olduqca yüksəkdir”, – deyə Oblak bildirib.
Qeyd edək ki, Ronaldu 2009-2018-ci illərdə “Real Madrid”də çıxış edib. 2 yanvar 2023-cü ildə Səudiyyə Ərəbistanının “Ən-Nəsr” klubunun oyunçusu olub və müqaviləyə əsasən, 200 milyon avro qazanc əldə edir.
Ötən mövsüm o, Səudiyyə Ərəbistanı çempionatında 16 oyun keçirib, 14 qol vurub və 2 məhsuldar ötürmə edib. Avqustun 12-də Ronaldu “Ən-Nəsr”in tərkibində Ərəb Çempionlar Kuboku çərçivəsində ilk kubokunu qazanıb.
Messi 2003-2021-ci illərdə Kataloniya “Barselona”sında çıxış edib. 2022-ci ilin dekabrında Argentina millisinin tərkibində dünya çempionu olub. Həlledici görüşdə cənubi amerikalılar Fransaya penaltilər seriyasında qalib gəliblər. Messi turnirin ən yaxşı oyunçusu seçilib.
Bundan əvvəl isə Messi 21-ci əsrin ən yaxşı futbolçuları reytinqində Ronaldunu geridə qoyub.
Mənbə: Gazeta.ru
Xeberal.az
