ABŞ-nin Nyu-York şəhərində Azərbaycanın BMT yanında daimi nümayəndəliyinin təşkilatçılığı ilə Dünya Azərbaycanlılarının Həmrəylik Günü və Yeni il münasibətilə tədbir keçirilib.
“Report”un yerli bürosu xəbər verir ki, tədbirdə diplomatlar, Birləşmiş Ştatlarda fəaliyyət göstərən təşkilat və dərnək rəhbərləri, Nyu-Yorkda yaşayan Azərbaycan icmasının nümayəndələri iştirak ediblər.
Əvvəlcə Azərbaycanın Dövlət Himni səsləndirilib və torpaqlarımızın azadlığı uğrunda canlarını fəda etmiş şəhidlərimizin xatirəsi bir dəqiqəlik sükutla yad olunub.
Azərbaycanın BMT yanında daimi nümayəndəsi Yaşar Əliyev Dünya Azərbaycanlılarının Həmrəyliyi Günü münasibətilə soydaşlarımızı təbrik edib. Diplomat bildirib ki, Ali Baş Komandan İlham Əliyevin müdrik siyasəti və Azərbaycan Ordusunun gücü sayəsində ölkəmizin ərazi bütövlüyü bərpa olunub və artıq dünyanın bütün yerlərində yaşayan həmvətənlərimiz bütöv Azərbaycanın vətəndaşları olaraq Həmrəylik Gününü qeyd edirlər.
Y.Əliyev söyləyib ki, ulu öndər Heydər Əliyev tərəfindən təməli qoyulan Dünya Azərbaycanlılarının Həmrəyliyi Günü getdikcə daha böyük məna və əhəmiyyət kəsb edir:
“Dövlət quruculuğunun bütün sahələrində əldə olunan mühüm nailiyyətlər Azərbaycanın dünya birliyində layiqli yer tutmasına geniş imkanlar açır. Elə bunun nəticəsidir ki, dünyanın ən böyük və mühüm dövlətlərarası tədbirlərindən biri olan BMT-nin İqlim Dəyişikliyi üzrə Çərçivə Konvensiyasının Tərəfləri Konfransının 29-cu sessiyası – COP29 gələn il Azərbaycanda keçiriləcək. Azərbaycanın bu tədbirə ev sahibliyi etməsi Prezident İlham Əliyevin növbəti təntənəli qələbəsinin və beynəlxalq ictimaiyyətin ölkəmizə yekdil dəstəyinin təzahürüdür”.
Tədbirdə ümummilli lider Heydər Əliyevin Azərbaycanın ərazi bütövlüyünün bərqərar olunması ilə bağlı arzularının əks olunduğu və Prezident İlham Əliyevin işğaldan azad edilmiş tarixi torpaqlarımızda – Şuşada, Laçında, Xankəndidə lentə alınmış videogörüntüləri nümayiş olunub.
Sonda ABŞ-də fəaliyyət göstərən azərbaycanlı musiqiçilər Samir və Veronikanın ifasında xalq və bəstəkar mahnıları səsləndirilib.
Xeberal.az
