“Son aylar ərzində ümumilikdə 576 ağac və kol məhv edilib, təbiətə 59 827 manat ziyan dəydiyi müəyyən olunub və Dövlət Ekoloji Təhlükəsizlik Xidməti tərəfindən sənədləşdirilərək hüquqi qiymət verilməsi üçün Baş Prokurorluğa göndərilib”.
Bunu “Report”un sorğusuna cavab olaraq Dövlət Ekoloji Təhlükəsizlik Xidmətinin rəisi Hikmət Əlizadə deyib.
Onun sözlərinə görə, Dövlət Xidməti və onun yerli bölmələrinin ötən aylar ərzində həyata keçirdiyi tədbirlər çərçivəsində yaşıllıqların kəsilməsi ilə bağlı bir sıra pozuntular aşkar edilərək sənədləşdirilib:
“Dəymiş ziyanın məbləği cinayət tərkibi yaratdığından hüquqi qiymət verilməsi üçün Baş Prokurorluğa göndərilib. Belə ki, Göyçay rayonunun Şıxbəy kəndi ərazisində 74 ağac (ziyan 17 610 olmaqla), Bərdə rayonunun Əyricə kəndi ərazisində dörd ağac (ziyan 5 950 manat olmaqla ) İmişli rayonunun Ağaməmmədli kəndində 71 ağac (ziyan 5 680 manat) Yardımlı rayonunun ərazisində 86 ağac (ziyan 3 307 manat) Biləsuvar rayonunda 341 kol (ziyan 27 280 manat) olmaqla ümumilikdə 576 ağac və kol məhv edilib və təbiətə 59 827 manat məbləğində ziyan dəydiyi müəyyən edilib. Bütün faktlar yerində sənədləşdirilərək hüquqi qiymət verilməsi üçün Baş Prokurorluğa göndərilib”.
H.Əlizadə yaşıllıqlara dəymiş ziyanın qarşısının alınması, təqsirkarların müəyyənləşdirilərək cəzalandırılması istiqamətində gördükləri işlərə görə hüquq-mühafizə orqanlarına minnətdarlığını bildirib.
Xeberal.az
