Prezident İlham Əliyevin imzaladığı Sərəncamla Rüfət Eyvaz oğlu Əzizov Sumqayıt Dövlət Universitetinin (SDU) rektoru təyin edilib.
Oxu.Az xatırladır ki, Rüfət Əzizov bu təyinatadək Təhsil İnstitutunun direktoru vəzifəsini icra edib.
Rüfət Əzizov 1998-ci ildə Beynəlxalq Mendeleyev Kimya Olimpiadası qalibi kimi Lomonosov adına Moskva Dövlət Universitetinin Kimya Fakültəsinə imtahansız qəbul olub və 2003-cü ildə oranı bitirib.
Həmin universitetdə aspirantura təhsilinə davam edərək, 2006-cı ildə namizədlik dissertasiyasını müdafiə edib və Kimya Elmləri Namizədi (PhD) elmi dərəcəsini alıb.
2008-ci ildə peşəkar inkişaf proqramını bitirərək, London Materiallar İnstitutunun peşəkar üzvlüyünə qəbul olub (“Chartered Scientis”t).
2014-2016-cı illərdə ADA/“Maastricht” Universitetlərinin birgə MBA proqramını və 2018-2020 illərdə isə Oksford Universitetinin (“Said Business School”) ali biznes idarəçiliyi, “Executive” MBA proqramını bitirib.
Rüfət Əzizovun iş təcrübəsi biotexnologiya, kimyəvi kataliz, pedaqoqika, neft-qaz sənayesi, metal istehsalı, sənaye layihələrinin idarə olunması, təhsil və istehsal bizneslərini əhatə edir.
2 il (2003-2005) Lomonosov adına MDU-da elmi-işçi vəzifəsində çalışaraq, biokorroziya üzrə araşdırma və inkişaf proqramlarında iştirak edib.
8 il (2005-2012) bp şirkətində mühəndis kimi beynəlxalq neft-qaz layihələrində təcrübə qazanıb, material/korroziya mühəndisliyi və texnoloji bütövlüyün idarə olunması meneceri vəzifələrində çalışıb.
2008, 2010 və 2011-ci illərdə müxtəlif nominasiyalar üzrə “bp-də İlin Mühəndisi” Mükafatına layiq görülüb.
2012-ci ildən metal istehsalı sahəsində fəaliyyət göstərən “Unimetal-Prometal” şirkətlər qrupunun icraçı direktoru kimi metal sənayesi layihələrini, istehsal əməliyyatlarını və strateji inkişaf proqramlarını idarə edib.
Oksford Universitetinin İnnovasiyalar mərkəzində elmi nəticələrin kommersiyalaşdırılması proqramında ekspert kimi fəaliyyət göstərir.
Ailəlidir. 2 övladı var.
Xeberal.az
