Türkiyədə dağıdıcı zəlzələ nəticəsində xəsarət alan və müalicə üçün Azərbaycana gətirilən Vəfa Seyidova Prezident İlham Əliyevə təşəkkür edib.
“Report” xəbər verir ki, zərərçəkmiş Azərbaycanda onlara çox yaxşı baxıldığını və bu gün sığınacağa gedəcəyini bildirib.
V.Seyidova deyib ki, zəlzələ çox dəhşətli olub:
“Sanki ölümdən döndük. Psixoloji olaraq böyük zərbə aldıq. 5 ildir Türkiyədə, Qaziantepdə yaşayırıq. İlk dəfədir belə bir şey görürəm. Binamız çox silkələndi. Oradan sağ çıxacağımızı heç təsəvvür etmirdim. Evlərdə zədələr var, binalar çatlayıb. Uşaqlar psixoloji travma aldılar”.
“Digər zərərçəkmiş Ülviyyə Həsənova isə deyib ki, zəlzələ baş verən vaxt yuxuda olublar: Uşağın səsinə oyandıq və zəlzələnin baş verdiyini gördük. Evdən qaçmağa qərar verdik və uşağı adyala bürüyüb, evdən çıxdıq. Yaşadığımız ev üçmərtəbəli idi və zəlzələ nəticəsində çatlar əmələ gəlib. Zəlzələdən sonra üç gün çöldə, bir gün isə sığınacaqda qaldıq. Azərbaycana gəlməyimizə səbəb uşaqdır. Həkimlər uşağı müayinə etdilər və sadəcə soyuqdəyməsinin olduğunu dedilər. Bu gün sığınacağa yerləşdiriləcəyik. Hər şey qaydasına düşdükdən sonra geri dönməyi düşünürük”.
Xeberal.az
