Xırdalan şəhəri 30-cu məhəllə 11 saylı binanın qarşısında qanunsuz tikinti aparıldığı iddia olunub.
Sakinlərin sözlərinə görə, vaxtilə uşaq parkı olan ərazi qanunsuz olaraq zəbt edilib.
Sakinlər deyirlər ki, Ali Məhkəmə 2020-ci ildə vətəndaş İlhamə Quliyevanın tikinti aparılmasına dair iddianaməsini rədd etsə də, sonradan ona 2022-ci ildə Daşınmaz Əmlakın Dövlət Reyestr Xidmətinin Abşeron şöbəsi tərəfindən mülkiyyət hüququ verilib. O da tikinti aparılması üçün Rizvan Xəlilov adlı şəxsə etibarnamə verib.
Məsələ ilə bağlı Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestri Publik Hüquqi şəxsin Abşeron ərazi idarəsindən Bakı TV-yə bildirilib ki, idarə 2020-ci ildə bu işlər üzrə məhkəmə icraatına cəlb edilib, sözügedən məhkəmə qərarları Ərazi İdarəsinə daxil olmayıb.
“Ərazi İdarəsinin üzərinə hər-hansı bir öhdəlik qoyulmayıb. Məhz bu səbəbdən əmlakın dövlət reyestrindən verilən çıxarışın ləğv edilməsinə münasibət bildirilməyib, daşınmaz əmlakın üzərinə məhdudiyyət qoyulması barədə hər-hansı məhkəmə aktı 4 saylı Abşeron Ərazi İdarəsinə daxil olmayıb. Buna görə həmin şəxsə yenidən 2022-ci ildə çıxarış təqdim edilib. Ərazi İdarəsinin elektron baza məlumatlarında isə Abşeron rayonu, Xırdalan şəhəri, 30-cu məhəllədə yerləşən 156 kvadratmetr torpaq sahəsi park ərazisi kimi qeyd olunmayıb”, – deyə qurumdan əlavə edilib.
Qeyd edək ki, sözügedən tikinti dayandırıldıqdan dərhal sonra daş hasar sakinlər tərəfindən sökülüb.
Ətraflı Baku TV-nin süjetini təqdim edirik:
Xeberal.az
