Prezident İlham Əliyev Türkiyənin “Anadolu” Agentliyinə müsahibəsində deyib ki, indi Ermənistanda və bəzi xarici siyasətçilər bizi Ermənistan torpaqlarını işğal etməklə günahlandırır: “Birincisi, bu yalandır. İkincisi, Ermənistan bizi işğal edəndə niyə səsinizi qaldırmırdınız? Niyə gözünüzü bağlayırdınız? 30 il ərzində sadəcə işğal deyil, bütün tarixi və dini abidələrimiz yerlə-yeksan edildi. Bütün binalar dağıdıldı. Bunu görmürdünüzmü? Minsk Qrupunun həmsədrləri dəfələrlə orada oldu. Ağdamda, Kəlbəcərdə, Füzulidə, Cəbrayılda oldular. Görmürdülərmi? 30 illik işğal dövründə sadəcə 2 dəfə araşdırma missiyası göndərildi və hesabat hazırlandı. Hesabatda ermənilərin törətdiyi bütün cinayətlər göstərildi. Sonuncu missiya təxminən 10 il əvvəl həyata keçirildi. Minsk Qrupu həmsədrlərinə yenidən missiya göndərmələri məsələsində dəfələrlə müraciət etdik. Orada məskunlaşma həyata keçirilirdi. Suriya, Livan və başqa ölkələrdən ermənilər gətirilərək orada məskunlaşdırılırdılar. Bu, bir müharibə cinayətidir. Bütün beynəlxalq konvensiyalara görə, bu müharibə cinayətidir. Bunu etmədilər. Bu işğalı 30 il ərzində görməyən, indi isə olmayan işğalı görən əlbəttə ya kordur, ya da nankordur, ya da sadəcə riyakardır. Bu, daha doğru ifadə ola bilər.
Noyabrın 9-dan 10-na keçən gecə imzalanmış Bəyanatda göstərilir ki, Azərbaycanın əsas hissəsi ilə Naxçıvan Muxtar Respublikası arasında bağlantı olmalıdır. Dəhlizlərin açılması prinsipial məsələdir. Bu bağlantını təmin etmək üçün o qədər də böyük zamana ehtiyac yoxdur. Orada quru yollarla məsafə cəmi 40 kilometrdir. Biz müharibədən sonra keçən bir il ərzində min kilometrdən çox yol çəkdik – həm torpaq yol, həm asfalt yol. İndi orada 40 kilometr yolun açılması böyük problem deyil. Ancaq buna baxmayaraq, aparılan müzakirələr nəticəsiz qalıb. Yəni, Ermənistan 10 noyabr Bəyanatını, onun şərtlərini kobudcasına pozur. Ermənistan rəhbərliyi imzalanmış Bəyanatın bütün müddəalarını yerinə yetirməlidir.
Biz öz ata yurdumuza döndük. 30 ildir, orada yox idik. Əgər Ermənistan sərhədin oradan keçdiyini deyirsə, niyə orada heç kim yoxdu? Əgər ora sərhəddirsə, gəl sərhədi qoru. Biz gəldik o dağlara yerləşdik və bizim xəritələrimizə görə, biz öz torpaqlarımıza yerləşdik. Əgər Ermənistan fərqli düşünürsə, gəlsin otursun, bunu müzakirə edək. Bir il çəkər, 5 il çəkər, 30 il çəkər, kim bilir. Yenə bu məsələyə qayıdıram, sərhədlər məsələsində Ermənistan bu gün həqiqəti anlamalıdır. Qısa zamanda şərtlərimizi qəbul edib bu məsələni həll etməlidir ki, hər kəs öz sərhədinin harada olduğunu bilsin”.Ofeliya Qəhrəmanova, H.Ə. Mərkəzinin direktoru
