Yaxın vaxtlarda Qazaxıstanın Aktau şəhərində “Azərbaycan Ticarət Evi”nin filialı açılacaq.
Bunu “Report”a Azərbaycanın Aktaudakı konsulu Elmar Məmmədov deyib.
E.Məmmədovun sözlərinə görə, Azərbaycan iş adamlarının Aktau şəhərinə böyük maraqları var:
“Hazırda müxtəlif sahələr üzrə 100-dən artıq Azərbaycan şirkəti burada çalışır. İki ölkə arasında ticarət dövriyyəsi müsbət qiymətləndirilə bilər. Bu yerli əhali tərəfindən çox maraqla qarşılandı”.
Konsul əlavə edib ki, Aktauda “Azəravtomaş” ASC-nin nümayəndəliyi də tikilməkdədir: “Onlar burada transformatorların yığılmasını həyata keçirəcək”.
E.Məmmədov qeyd edib ki, burada əsasən Azərbaycan iş adamları ticarət sahəsinə maraq göstərir:
“Ölkəmizin meyvə-tərəvəz məhsullarının yaxud Azərbaycan ərazisindən başqa ölkələrin kənd təsərrüfat məhsullarının gətirilməsi və satışı iş adamlarımıza daha cəlbedicidir”.
Xatırladaq ki, 2021-ci ildə Qazaxıstanın paytaxtı Nur-Sultanda “Azərbaycan Ticarət Evi”nin açılışı olub.
Xeberal.az
