Azərbaycan respublikasının Müdafiə Nazirliyindən verilən rəsmi məlumata görə sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Bu hadisənin əsas səbəblərindən biri, bəlkə də başlıcası odur ki, 2020-ci il müharibəsindən sonrakı dövrün reallıqlarının göstərdiyi kimi, bütün proseslər savaşın qalibi olan Azərbaycanın maraqlarına uyğun gəlir.
44 günlük müharibədən sonra Azərbaycan ardıcıl olaraq diplomatik müstəvidə də uğurlar qazandı. Müharibədən sonra aparılan bütün diplomatik danışıqlarda şərtləri məhz Bakı diktə etdi və Ermənistan tərəfi bu şərtləri qeyd-şərtsiz qəbul etməyə məcbur oldu. Bu, ötən il noyabrın 26-da Soçidə Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan arasında üçtərəfli görüşün nəticəsində qəbul edilən bəyanat da ölkəmizin növbəti diplomatik uğuru kimi xarakterizə olundu.
Ən mühümü odur ki, Bakı bütün reallıqları diktə edən tərəf kimi çıxış edir və İrəvanın bu həqiqətlərə uyğunlaşmaqdan başqa yolu yoxdur. Prezident İlham Əliyevin avqustun 31-də Brüsseldə Avropa İttifaqı Şurasının prezidenti Şarl Mişel və Ermənistanın baş naziri Nikol Paşinyanla görüşü də bunu təsdiq edir.
Beləliklə, Ermənistanın törətdiyi təxribatlar onu göstərir ki, erməni faşizmi öz nifrətindən əl çəkmir, vəhşiliklərini müxtəlif yollarla ifadə edir. Təəssüf ki, işğalçının reallaşdırdığı mina terrorunu, vandallığı beynəlxalq aləm susqunluqla qarşılayır. İstər İrəvanda, istərsə də Qarabağda revanşist qüvvələr tərəfindən Vətən savaşı başa çatandan bu vaxtadək işğalçı ölkədə iğtişaşlar törətmək, əhali arasında çaşqınlıq yaratmaq və Ermənistan– Azərbaycan sərhəd xəttində silahlı münaqişə gerçəkləşdirməklə bağlı saysız cəhdlər göstərilib. Şübhəsiz ki, əsas məqsəd iki dövlət arasında illərlə davam edən düşmənçiliyi daha da dərinləşdirmək, sülh sazişinin imzalanması yönündə fəaliyyəti məhdudlaşdırmaq, həmçinin məlum üçtərəfli Bəyanatın müddəalarının icrasının qarşısını almaq olub. Ancaq hər dəfə erməni separatçıları öz çirkin niyyətlərinə əl atanda Ermənistan böyük itkilərlə qarşılaşmalı olub və indi də belədir
Son erməni təxribatı zamanı şəhid olmuş qəhrəman əsgərlərimizə Allahdan rəhmət, onların doğmalarına və bütövlükdə xalqımıza səbr arzulayırıq. Allah qəhrəman şəhidlərimizə rəhmət eləsin.
Fərqanə Məmmədova,
YAP fəalı
