“Bilirdik ki, “Qarabağ” bizi irəlidə sıxacaq. Çox yaxşı təzyiq etdilər. Bunu xüsusilə ilk hissədə gördük. “Qarabağ”ı təbrik edirəm. Rəqib qələbəyə layiq idi”.
Oxu.Az xəbər verir ki, bu sözləri Norveçin “Molde” klubunun baş məşqçisi Erlinq Moe Avropa Liqasının qrup mərhələsinin I turunda Bakıda “Qarabağ”la oyundan sonra mətbuat konfransında deyib.
0:1 hesabı ilə məğlub olan komandanın çalışdırıcısı sözlərinə belə davam edib:
“Hər zaman oyunu geridə qurmağa çalışırıq. Bu istiqamətdə inkişaf etməliyik. Uzun toplarla müdafiədən çıxmağı futbol saymıram. Öz meydanımızda daha yaxşı oynayacağımıza inanıram”.
E.Moe bildirib ki, məğlubiyyətə görə məyusdur:
“Uduzmağı sevmirəm. Buna görə özümü yaxşı hiss etmirəm. Bu gün yaxşı oynamadıq. Xüsusən ilk hissədə müdafiədən çıxarkən zəif çıxış etdik. “Qarabağ”dan bir addım geridə idik. Komandamın performansını görə məyusam”.
Baş məşqçi qrupda ikinci pilləyə iddia etdiklərini söyləyib:
“Hələ qrupdakı yekun mövqelər barədə danışmaq üçün çox tezdir. Cəmi bir oyun keçirmişik. Bir neçə matçdan sonra daha konkret danışmaq olar. “Bayer” qrupun favoritidir. “Qarabağ”, “Hakken” və biz ikinci yer uğrunda mübarizə aparacağıq”.
Faiq Tahirov
Xeberal.az
