“AFFA-nın 12 kluba lisenziya verməsi Premyer Liqada komanda sayının artırılması anlamına gəlmir”.
Bu barədə Oxu.Az-a açıqlamasında qurumun Mətbuat Xidmətinin rəhbəri Firuz Abdulla məlumat verib. O bildirib ki, komanda sayının artırılması ilə bağlı İcraiyyə Komitəsinin qərarı olmalıdır:
“Lisenziya verilibsə, o demək deyil ki, mütləq lisenziya alan klubların sayı qədər Premyer Liqa iştirakçısı olacaq. Elitada klub sayının müəyyənləşdirilməsi ilə bağlı İcraiyyə Komitəsində qərar olmalıdır”, – F.Abdulla bildirib.
Xatırladaq ki, AFFA-nın Lisenziyalaşdırma Komissiyasının bu gün keçirilən iclasında hazırda Premyer Liqada yarışan “Qarabağ”, “Neftçi”, “Sabah”, “Zirə”, “Qəbələ”, “Turan Tovuz”, “Səbail”, “Sumqayıt”, “Kəpəz” və “Şamaxı ilə yanaşı, iki I Divizion komandası – “Araz-Naxçıvan” və “Zaqatala”ya da elitada iştirak üçün lisenziya verilib.
14:11
Bu gün AFFA-nın Lisenziya Komissiyasının iclası keçirilib.
AFFA-nın saytının yaydığı məlumata görə, toplantıda 2023/24-cü illər mövsümündə UEFA-nın klub yarışlarında və Azərbaycan Premyer Liqasında iştirak etmək üçün müraciət etmiş klubların sənədlərinə baxılıb.
AFFA-nın Lisenziya Komissiyası klubların lisenziyalaşdırılması üzrə qaydaların (Buraxılış 2022) 8-ci maddəsinə əsaslanmış müzakirələrdən sonra aşağıdakıları qərara alıb:
1. UEFA-nın klub yarışlarında iştirak etmək üçün aşağıdakı klublara lisenziya verilsin:
“Qarabağ” FK, “Sabah” FK, “Neftçi” PFK, “Zirə” PFK, “Qəbələ” İK;
2. UEFA-nın klub yarışlarında iştirak etmək üçün aşağıdakı klublara lisenziya verilməsin:
“Turan Tovuz” PFK İB, “Səbail” PFK;
3. Premyer Liqa yarışlarında iştirak etmək üçün aşağıdakı klublara lisenziya verilsin:
“Turan Tovuz” PFK İB, “Səbail” PFK, “Sumqayıt” FK, “Kəpəz” PFK İB, “Şamaxı” FK İB, “Araz-Naxçıvan” PFK, “Zaqatala” PFK;
4. Premyer Liqa yarışlarında iştirak etmək üçün aşağıdakı klublara lisenziya verilməsin:
“İmişli” PFK, “Mingəçevir” FK, MOİK PFK, “Qaradağ Lökbatan” FK.
Lisenziya iddiaçısı lisenziya ilə bağlı imtina barədə verilmiş bildiriş tarixindən etibarən 10 gün müddətində AFFA-nın Lisenziyalaşdırma üzrə Apellyasiya Komitəsinə apellyasiya şikayəti verə bilər.
Qeyd edək ki, “UEFA-nın klub yarışlarında iştirak etmək üçün Azərbaycan futbol klublarının lisenziyalaşdırılması və maliyyə dayanıqlığı üzrə qaydalar”ın (Buraxılış 2022) 14-cü maddəsinə müvafiq olaraq, 2023/24-cü illər mövsümündə UEFA-nın klub yarışlarında iştirak etmək üçün lisenziya almış klublar avtomatik olaraq eyni mövsüm üçün Azərbaycan Premyer Liqa yarışlarında iştirak etmək üçün lisenziya almış hesab olunur.
Faiq Tahirov
Xeberal.az
