Adıyamanın Besni rayonunda (Türkiyə) keçən il baş verən zəlzələdən təxminən 5 saat sonra dağıntılar altından xilas edilən Xədicə Düzer 111 yaşını qeyd edib.
Xədicə Düzer yanvarın 28-də xəstələnib və yaxınları tərəfindən xəstəxanaya aparılıb. Ona pnevmoniya diaqnozu qoyulub. Bir neçə gün reanimasiyada müalicə aldıqdan sonra evə buraxılan qadın üçün xəstəxana rəhbərliyi, həkim və tibb bacıları “Doğum günün mübarək! 111” yazılmış tort kəsiblər.
Danışmaqda çətinlik çəkən qadının nəvəsi Neslihan Bakır nənəsinin 111 yaşının olduğunu və bu yaşa qədər bir çox çətinliklərin öhdəsindən gəldiyini bildirib. O, 1913-cü il iyulun 1-də Yavuzeli rayonunda doğulub, 8 övladı və 36 nəvəsi var.
Mənbə: Anadolu Agentliyi
Xeberal.az
