Türkiyənin xarici işlər naziri Mövlud Çavuşoğlu Türkiyə və Misir prezidentləri Rəcəb Tayyib Ərdoğan və Əbdülfəttah əs-Sisi arasında şəxsi danışıqların mümkünlüyünü açıqlayıb.
“Müxtəlif sahələrdə əlaqələrin inkişafı üzərində işləməliyik. Bu gün danışıqlarda biz hələ hansı mövzular üzərində işləməli olduğumuzu müzakirə etdik. Danışıqlarımızdan sonra prezidentlərimiz də görüşə bilər. Türkiyədə və ya Misirdə belə bir görüşü hazırlamaq Xarici İşlər Nazirliyinin vəzifəsidir və biz bununla məşğul olacağıq”, – Çavuşoğlu bazar ertəsi Mersin şəhərində Misirin xarici işlər naziri Sameh Şükri ilə keçirdiyi mətbuat konfransında bildirib.
Çavuşoğlu xatırladıb ki, 2022-ci ildə prezidentlər arasında artıq qısa söhbət olub. Noyabrın 19-da əs-Sisi və Ərdoğan iki ölkə arasında uzun müddət davam edən münasibətlərin soyumasından sonra Qətərdə Dünya Çempionatının başlaması münasibətilə keçirilən mərasimdə söhbətləşiblər.
“Prezidentlərimiz söhbət zamanı bütün sahələrdə əlaqələri daha da yaxşılaşdırmaq barədə razılığa gəliblər. Əslində, ikitərəfli ticarət-iqtisadi əməkdaşlıq dövlətlərarası münasibətlərin çox yaxşı olmadığı dövrdə də davam edib”, – türkiyəli nazir bildirib.
Xatırladaq ki, Türkiyə ilə Misir arasında münasibətlər 2013-cü ildə hərbçilər islamçıların himayədarı Məhəmməd Mursini devirdikdən sonra pisləşib, bundan sonra tərəflər səfirlərini geri çağırıb.
Mənbə: Anadolu
Xeberal.az
