Əfsanəvi “Bakılı oğlanlar” KVN komandasının üzvü, azərbaycanlı aktyor, publisist, Əməkdar artist Bəhram Bağırzadənin müəllifi olduğu kitabları artıq Çexiyada da əldə etmək mümkün olacaq.
Belə ki, Çexiyada məşhur olan kitab mağazalardan birində Bəhram Bağırzadənin “Azərbaycanın xristian kilsələri”, “Bakı”, “Şuşa” və “Praqa” adlı dörd kitabı satışa çıxarılıb.
Müsahibələrinin birində Bəhram Bağırzadə özü də qeyd edib ki, dünya səviyyəsinə çıxmaq üçün yaxşı, keyfiyyətli kitablar çap etdirməyə başlayıb.
“Mən yaradıcı olmaq, uşaqlar üçün gözəl tərtibatda çap etdirmək, onları Boloniya Kitab Sərgisinə aparmaq, orada olmaq və iştirak etmək istəyirəm. Əgər Allah nəsib etsə, “Bəhram dayının yanında” adlı kiçik uşaq kitab mağazası açmaq istəyirəm”, – deyə aktyor qeyd edib.
Qeyd edək ki, Bəhram Bağırzadə 120-dən çox uşaq kitabının müəllifidir.
Tanınmış aktyorun kitablarına gəlincə, onların sayəsində gənc oxucular təkcə Azərbaycan haqqında deyil, həm də dünyanın digər ölkələri haqqında çoxlu yeni və informativ məlumatlar öyrənirlər.
Xeberal.az
