“Kəpəz” komandası Azərbaycan Premyer Liqasının XXII turunda “Səbail”ə uduzduqları oyunda hakim idarəçiliyindən narazı qalıb.
Bu barədə Gəncə təmsilçisi rəsmi “Facebook” hesabında paylaşım edib.
“Verilən qərarlarla BARIŞmırıq! “Səbail” ilə oyunun 44-cü dəqiqəsində qapımıza təyin olunan penalti epizodundan əvvəl künc zərbəsi zamanı rəqib futbolçu Amil Yunanovu arxadan itələsə də, baş hakim Nicat İsmayıllı qayda pozuntusunu qeydə almadı. Eyni epizodun davamında Junior Martinsin zərbəsindən sonra top “Səbail”in oyunçusuna toxunaraq meydanı tərk etdi. Laynsman topun rəqibdən çıxdığına işarə edərək bayrağını müvafiq istiqamətə yönləndirsə də, baş hakim yenə fərqli qərar qəbul etdi. Son nəticədə epizodun davamı qapımıza penalti ilə nəticələndi. 48-ci dəqiqədə komandamızın yerinə yetirdiyi künc zərbəsi zamanı rəqib futbolçu Rüfət Abdullazadə cərimə meydançasında hər iki əli ilə topla oynasa da, referi VAR-a ehtiyac duymadı”, – klubun bəyanatında vurğulanıb.
Sonda isə bildirək ki, görüş bölgə klubunun 1:4 hesablı məğlubiyyəti ilə bitib.
Xatırladaq ki, daha əvvəl “Zirə” komandasının baş məşqçisi Rəşad Sadıqov da çempionat oyunlarında hakim idarəçiliyindən narazılığını bildirmişdi.
Xeberal.az
