Sənaye parkları ölkədə qeyri-neft sektorunun davamlı inkişaf etdirilməsində, ölkə iqtisadiyyatının ixrac qabiliyyətinin, eləcə də rəqabət qabiliyyətli, idxalı əvəz edən məhsulların istehsalının artırılmasında mühüm rol oynayır.
İZİA-dan verilən məlumata görə, sənaye parklarının rezidentləri tərəfindən istehsal olunan məhsullar ölkədə daxili bazarın tələbatının ödənilməsi ilə yanaşı, “Made In Azerbaijan” brendi ilə bir çox ölkələrə ixrac edilir.
Belə ki, Sumqayıt Kimya Sənaye Parkının rezidentləri “SOCAR Polymer” MMC və “STP” MMC-yə məxsus “STP Global Cable” MMC İqtisadi İslahatların Təhlili və Kommunikasiya Mərkəzi tərəfindən hazırlanan “İxrac İcmalı” jurnalının 2023-cü ilin oktyabr ayı üzrə qeyri-dövlət və dövlətə məxsus olan ixracatçı subyektlərin reytinqində ilk onluğa daxil ediliblər.
Reytinq cədvəlində “SOCAR Polymer” MMC dövlətə məxsus olan şirkətlərin siyahısında üçüncü, “STP” MMC-nin tərkibində fəaliyyət göstərən “STP Global Cable” MMC isə qeyri-dövlət ixracatçı subyektləri arasında altıncı yerdə qərarlaşıb.
Qeyd edək ki, 2023-cü ilin 9 ayı ərzində “SOCAR Polymer” MMC 393 milyon manat, “STP Global Cable” MMC isə 31,5 milyon manat dəyərində məhsul ixrac edib.
Xeberal.az
