Cəmiyyət

“Məktəbli formasının satışında izdiham ötənilki kimi olmayacaq” – REPORTAJ + FOTO

Sharing is caring!


Artıq valideynlər 2023-24-cü tədris ili üçün məktəbli forması almaq niyyəti ilə mağazalara üz tutublar.

“Report”un əməkdaşları satış prosesi ilə yaxından tanış olmaq üçün məktəbli formalarının istehsal edildiyi Bakı Tikiş Evinə (BTE) yollanıblar.

Məktəblərin açılmasına bir aydan çox vaxt qalmasına baxmayaraq, artıq müəssisədə alıcı sıxlığı müşahidə olunur.

BTE-nin satış müdiri Etibar Əzimov bildirib ki, hazırda satışda və anbarda kifayət qədər məktəbli forması var:

“Müəssisəmiz saat 9:00-dan saat 18:00-a kimi nahar fasiləsi olmadan, şənbə və bazar günləri də daxil olmaqla bütün iş saatlarında fəaliyyət göstərir. Ötən il məktəbli formalarının istehsalı ilə bağlı çox gec, mart ayında qərar verildi. Həmin vaxt formaları yalnız biz istehsal edirdik. Hazırda isə 10 satış mərkəzimiz mövcuddur. Dünən isə “Bravo” mağazalar şəbəkəsinə geyimlər göndərmişik”.

Onun sözlərinə görə, bu il məktəbli formaları üç rəngdə satışdadır:

“Bizə liseylərdən də müraciət olunur. Ancaq biz bunun hesabatını aparmırıq. Əgər kimsə bəyənirsə, geyimləri bizdən alır. Məktəbli geyimləri üçün parçaları Özbəkistan, Belarus və Türkiyədən gətiririk. Özbəkistandan polo köynəklərin, Belarus və Türkiyədən isə ətək və şalvarların parçaları gətirilir”.

Şöbə müdiri vurğulayıb ki, ötən il məktəbli forması satan 10 mağaza olmadığından tikiş evinin qarşısında izdiham yaşanmışdı:

“Düşünürəm ki, bu il eyni problemlə qarşılaşmayacağıq”.

Tikiş evindəki müştərilərdən biri Pərvanə Nəcəfova söhbət zamanı qiymətlərdən razı olduğunu söyləyib:

“Artıq iki ildir, məktəbli formasını Bakı Tikiş Evindən (BTE) alıram. Geyimlər keyfiyyətlidir. Bütün istədiklərimzi tapıb ala bildik. Qiymətlər o qədər də baha deyil. Oğlum üçün bir uzunqol, bir polo köynək, bir ədəd isə şalvar almışam. Ümumilikdə geyimlərə 54 manat ödədim”.

Qeyd edək ki, Nazirlər Kabinetinin qərarına əsasən, 2023-24-cü tədris ilində ölkənin ümumi təhsil müəssisələrində vahid məktəbli geyimi tətbiq edilib. Həmin qərara əsasən, məktəblər tərəfindən dörd rəngdə geyim formasından birinin seçilməsi nəzərdə tutulub.

Xeberal.az

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir