Hamilə qadınların vitamin və minerallara ehtiyacı kəskin şəkildə artır. Onların bəziləri qidadan, bəziləri isə əlavələr şəklində əldə edilə bilər.
Bu barədə rusiyalı tibb elmləri doktoru Anna Marçenko danışıb.
Onun sözlərinə görə, hər bir qadına uşağın düzgün inkişafı üçün beş əsas mikroelement lazımdır.
Bunlardan birincisi fol turşusudur (vitamin B9).
“Fol turşusu hüceyrələrin böyüməsini və yenilənməsini təmin edir. Onun çatışmazlığı döldə qüsurların artmasına gətirir. Ən çox görülən sinir borusu qüsurudur və ilk trimestrdə meydana gəlir. Buna görə də, fol turşusunun çatışmazlığı uşaqda onurğa sütununun parçalanması, “dovşan dodaqlıq” və ya dodaq-damaq yarığı kimi nəticələrə səbəb ola bilər”, – deyə həkim izah edib.
Növbəti çox vacib mikroelement D vitaminidir.
“O, orqanizmdə kalsium mübadiləsini tənzimləyir: sümük toxumasının və diş minasının formalaşmasına, əzələlərin yığılmasına, sinir impulslarının ötürülməsinə cavabdehdir, maddələr mübadiləsinə, immun və hormonal sistemlərə təsir göstərir. D vitamini çatışmazlığı gələcək körpənin skeletinin inkişafına mənfi təsir göstərə bilər və yeni doğulmuş körpədə raxit xəstəliyinə səbəb ola bilər. Ancaq bu vitaminin əlavə olaraq qəbul edilib-edilməməsinə yalnız həkim qan testlərinə əsasən qərar verə bilər. Əgər hamilə qadın tam və balanslı qidalanırsa, gündüzlər çöldə gəzirsə, bir qayda olaraq, ona əlavə D vitamini dozası lazım deyil. Onun həddindən artıq dozası təhlükəlidir və zəhərlənmə ilə nəticələnə bilər”, – deyə həkim qeyd edib.
Hamilə qadın üçün dəmir də az əhəmiyyət kəsb etmir.
“Bu, dölün beyninin inkişafı, plasentanın formalaşması, həmçinin vaxtında doğmaq, dölün böyüməsində problemlərin profilaktikası, anada preeklampsiyanın (qan təzyiqinin artması və ödem) qarşısını almaq üçün lazımdır. Normal qidalanma ilə hamilə qadın qidadan kifayət qədər dəmir alır. Onun çox hissəsi heyvan mənşəli zülallarda olur. Buna görə də hamilə qadınlar vegetarian pəhrizə riayət etməməlidirlər. Dəmir səviyyəsinin aşağı olması dölün normal inkişafına mane ola bilər. Artıq doza təhlükəli deyil və bir qayda olaraq, ciddi nəticələrə səbəb ola bilməz. Lakin dəmirin normadan artıq olması beynin normal fəaliyyətini təmin edən və orqanizmin immun reaksiyasının formalaşmasında iştirak edən sinkin mənimsənilməsi prosesini poza bilər”, – deyə ekspert vurğulayıb.
Növbəti mikroelement yoddur.
“Onun çatışmazlığı uşaqda əqli qüsurun inkişafına səbəb ola bilər. Doza həddinin aşılması halında, artıq yod bədəndə yığılmır, sidiklə birlikdə xaric olur. Lakin bu mikroelementin böyük dozaları uzun müddət ərzində orqanizmə daxil olarsa, bu, qalxanabənzər vəzinin düzgün fəaliyyətini poza bilər”, – deyə ginekoloq xəbərdarlıq edib.
Siyahını kalsium bağlayır.
“Bu, doğulmamış uşağın skeletinin düzgün formalaşması və ananın dayaq-hərəkət sisteminin sağlam vəziyyətdə saxlanması üçün lazımdır. Tədqiqatlar göstərib ki, hamiləlik dövründə kalsium çatışmazlığı olmayan qadınların sonrakı həyatlarında osteoporoz riski daha azdır. Kalsium əlavələrini özünüz təyin etməsəniz daha yaxşıdır. Həddindən artıq doza hamilə qadın üçün heç də az əhəmiyyət kəsb etməyən dəmirin sorulmasına mane olur”, – deyə həkim yekunlaşdırıb.
Mənbə: Gazeta.ru
Xeberal.az
