“İstədikləri oyunu nümayiş etdirə bilsələr, Norveçdə qələbə qazana bilərlər”.
Bunu “Report”a açıqlamasında “Qarabağ”ın sabiq futbolçusu Əfran İsmayılov “köhlən atlar”ın bu gün Norveçdə “Molde”yə qarşı keçirəcəyi UEFA Avropa Liqasının qrup mərhələsinin V turunun oyunu ilə bağlı danışarkən deyib.
35 yaşlı sabiq yarımmüdafiəçi ölkə çempionunun Vətənə istədiyi nəticə ilə qayıda biləcəyini vurğulayıb:
“Komanda bunun üçün öz oyununu göstərməlidir. “Qarabağ”ı çox ağır qarşılaşma gözləyir. Hər iki kollektivin 6 xalı var və növbəti mərhələyə iddialıdırlar. Çox gərgin matç olacaq”.
Hazırda “Araz-Naxçıvan”da məşqçi kimi fəaliyyət göstərən Ə.İsmayılov başqa mühit və stadionun futbolçulara çətinlik yarada biləcəyini söyləyib:
“Amma artıq komanda bu cür çətinlikləri kifayət qədər görüb. Hər il bundan da iddialı rəqiblərlə üz-üzə gəliblər və öz dəst-xətləri var. Heç-heçə haqqında fikirləşmələrini istəmirəm. Belə düşüncədə olsalar, çətin olacaq. Heç-heçəyə oynasalar, dözə bilməyəcəklər. İstədikləri futbolu sərgiləsələr, qələbə qazana bilərlər. Çünki “Qarabağ” əks-hücumlara yaxşı çıxır və matçın taleyini həll edə biləcək futbolçuları var. Fərqlənmək üçün şanslar mütləq olacaq, bunlardan istifadə etməliyik”.
Qeyd edək ki, bu gün reallaşacaq “Molde” – “Qarabağ” görüşü Bakı vaxtı ilə saat 00:00-da başlayacaq.
Xeberal.az
