“Bu vəzifəyə təyin olunduğum üçün qürur duyuram”.
Bunu “Report”a açıqlamasında Azərbaycanın qadınlardan ibarət basketbol millisinin baş məşqçisi təyin edilən Evren Alkaya deyib.
Mütəxəssis, çətin olsa da, ölkəni layiqincə təmsil etməyə çalışacaqlarını bildirib:
“Mən və başqa bir məşqçinin adı namizədlər siyahısında idi. Əlimizdən gələni etmək üçün hər zaman hazır idik. Federasiya rəsmiləri də bunu bilirdilər və bizə etimad göstərdilər”.
Türkiyəli baş məşqçi aşağı yaş qrupları ilə bağlı proqram hazırladıqlarını və federasiyaya təqdim etdiklərini söyləyib:
“Beş ildən sonra yalnız azərbaycanlı basketbolçuların olacağı nəsil yetişdirmək istəyirik. Qarşıdakı turnirlər bizim üçün təcrübə olacaq”.
Evren Alkaya AVRO-2025-in seçmə mərhələsindəki şanslar və rəqiblər haqqında danışıb:
“Komandamız hələlik hazır deyil. Bildiyim qədər, Azərbaycanda 15 il əvvəl qadın basketbol yığması olub. Bu müddətdə bir neçə qadın basketbolçu yetişib. Bu səbəbdən işimiz çətin olacaq. Seleksiya aparacağıq. Çempion olan U-16 komandamız artıq U-17-dir. Oradan da oyunçular cəlb edəcəyik. Üst səviyyədə olan iki-üç idmançımız da var. Onları U-17 ilə birləşdirib bu çətin vəzifənin öhdəsindən gəlməyə çalışacağıq. AVRO-2025-in seçmə mərhələsindəki rəqiblərimiz çox güclüdürlər. Bizim milli hələlik bu səviyyədə deyil. Yığmanı ən qısa zamanda toplayıb hazırlıqlara başlayacaq. Çox çətin olacaq və istənilən nəticəyə hazır olmalıyıq”.
Mütəxəssis 3×3 basketbolu üzrə “Neftçi” klubunun ABŞ-dən olan basketbolçularından birini heyətə cəlb edəcəklərini, lakin hələlik onun adını açıqlamaq istəmədiyini vurğulayıb.
Qeyd edək ki, Azərbaycan millisi AVRO-2025-in seçmə mərhələsində Belçika, Litva və Polşa ilə birlikdə C qrupunda mübarizə aparacaq. Qarşılaşmalar noyabrda start götürəcək. Evren Alkaya daha əvvəl 16 yaşadək qızlardan ibarət millimizi Avropa çempionatının C divizionunda çempion edib.
Xeberal.az
