Qaçaqmalçılıq yolu ilə 83 kiloqram narkotik vasitəni ölkə ərazisinə keçirməyə çalışan daha bir dəstənin üzvləri saxlanılıblar.
Daxili İşlər Nazirliyi və Dövlət Sərhəd Xidmətinin əməkdaşları tərəfindən birgə həyata keçirilən xüsusi əməliyyat nəticəsində qaçaqmalçılıq yolu ilə ölkə ərazisinə külli miqdarda narkotik maddələr keçirməyə cəhd edən daha bir dəstənin üzvləri saxlanılıblar. Tədbir zamanı Şəki şəhər sakini əvvəllər məhkum olunmuş Famil Əliyev və həmyerlisi Elçin Məmmədov tutulublar. Onların əllərində olan bağlamaya baxış zamanı ümumilikdə 83 kiloqram, o cümlədən 69 kiloqram marixuana, 14 kiloqram tiryək və metamfetamin aşkar olunub.
Famil Əliyev narkotik maddələri satış məqsədilə “Yaşar” adlı İran İslam Respublikasının vətəndaşı vasitəsilə Füzuli rayonu ərazisində əvvəlcədən gizlədilən yerdən götürdüyünü bildirib. Bununla da İrandan Azərbaycana qaçaqmalçılıq yolu ilə narkotik vasitələr göndərən kanallardan daha birinə güclü zərbə endirilib.
Faktla bağlı Cinayət Məcəlləsinin müvafiq maddəsi ilə cinayət işi başlanılıb, hər 2 şəxs barəsində həbs qətimkan tədbiri seçilib, əməliyyat tədbirləri davam etdirilir.
Xeberal.az
