“Birləşmiş Millətlər Təşkilatı (BMT) işğaldan azad edilmiş ərazilərdə “xalis sıfır emissiya” zonasının yaradılmasında Azərbaycana yardım etməyə hazırdır”.
“Report” xəbər verir ki, bunu BMT-nin Azərbaycandakı Rezident Əlaqələndiricisi Vladanka Andreeva BMT-nin “DİM Dialoqları” təşəbbüsü çərçivəsində keçirilən “Azərbaycanda Yaşıl Transformasiya” konfransında deyib.
O bildirib ki, BMT-nin Dayanıqlı İnkişaf Məqsədləri (DİM) üzrə ilk dialoq Azərbaycanda “yaşıl transformasiya”ya yönəlib.
BMT-nin Rezident Əlaqələndiricisi noyabrın 6-da Misirin Şarm əş-Şeyx şəhərində İqlim Dəyişikliyi Konfransının (COP27) işə başlayacağını xatırladıb.
“Azərbaycan təmiz ətraf mühiti əsas məqsədlərindən biri kimi müəyyənləşdirib. Ötən il Qlazqo şəhərində keçirilən COP26 konfransında Azərbaycan işğaldan azad edilmiş ərazilərdə “xalis sıfır emissiya” zonası yaratmaq arzusunu ifadə edib. BMT bu məqsədlərə çatmaqda kömək göstərmək üçün Azərbaycanla işləmək niyyətindədir”, – V.Andreeva bildirib.
Xeberal.az
