Sosial şəbəkələrdə hər kəsi heyran qoyan altı yaşlı pəhləvan. Doqquzqat rəsmi dünya rekordçuları, Azərbaycanın Quba rayonunun Möhüc kəndindən olan pəhləvanlar – Hüseyn və Laçın Abdulhüseynov qardaşlarının yetirməsi olan bu balaca hər kəsi özünə heyran qoyub.
Bu gördüyünüz istedadlı oğlan Abdulhüseynov İbrahim Laçın oğludur. Pəhləvanın oğlu pəhləvan olar deyib bu balacanın sahəyə olan marağını elə atasından öyrəndik.
Oxu.Az altı yaşlı pəhləvan İbrahimin atası Laçın Abdulhüseynov ilə müsahibəni təqdim edir:
– Dörd yaşından bu sahəyə marağı olduğunu qeyd etmisiniz, dörd yaş çox tez deyilmi?
– Xeyr, bu bizim ata-babadan sənətimiz olub. Qardaşımla birlikdə bir çox beynəlxalq tədbirlərə, yarışlara gedəndə uşaqları da aparırdıq. Biz məşq edəndə həmişə dayanıb baxırdılar. Biz atamızdan öyrəndiyimiz kimi, onlar da bizə baxıb öyrənirlər.
– İbrahimin pəhləvanlıq yolunda ilk nömrəsi nə olub?
– Dörd yaşında dişləri ilə səkkiz kiloqramlıq çəki daşını qaldırırdı. Anası da daxil ailədəki xanımlar narahat olurdular, lakin uşaqların orqanizmi möhkəmdir. Bizim nəslin uşaqları möhkəmdir, dözümlüdür deyə onlara ürək rahatlığı ilə təlim keçə bilirik. Belə-belə, artıq beş yaşında on kq-lıq çəki daşı qaldıra bilirdi. Artıq sonrakı illərdə çəki daşlarını dişi ilə qaldırıb fırlatmağı da öyrəndi.
– Bu gün şüşə qırıntılarının üzərində gəzir, mismarların üzərinə uzanır. Bunlar təhlükəli deyilmi?
– Bütün bunların öz texnikası var. Bədən, dəri möhkəm olmalıdır. Fitnes məşqləri deyil, fiziki cəhətdən dözümlülük üçün məşqlər edilməlidir. Güc ustalarının məşq zamanı xüsusilə fikir verdikləri – düzgün tənəffüs sistemini formalaşdırmaqdır. Havanın qarın boşluğunda düzgün idarə edilməsi və qarın əzələlərinin məşqləri ən önəmli nüanslardan biridir.
– İbrahimin məşqlər zamanı xəsarət aldığı olubmu?
– Şükür ki, dörd yaşından bu günə qədər heç bir xəsarət almayıb. Hətta yarışlara qatılan zaman mənə deyir ki, “ata, asan nömrələr vermə, utanıram, mənə çətin nömrələri de”. (gülür). Birinci sinifdə oxumasına baxmayaraq Qubada rayon tədbirlərində çox fəal iştirak edir.
“Azəri qardaşlar” adı ilə beş gəncdən ibarət qrupumuz var. Onlarla dəfələrlə tədbirlərdə fəal iştirak etmişik. Qrup rayon icra başçısı, Gənclər və İdman İdarəsi və başqa tədbirlərdə fəxri fərman və diplomlarla mükafatlandırılıb.
– Qardaşınız Hüseyn bəylə birgə “America’s Got Talent” yarışında iştirak etmisiniz. Bəs bu gənclər öz şücaətini hansı beynəlxalq layihələrdə nümayiş etdirəcəklər?
– Bununla bağlı da planlarımız var. Belə ki, artıq xarici ölkələrdə bir çox istedad müsabiqələrinə, şou-proqramlara müraciət etmişik. Pandemiya zamanı bizə cavab gəldi. Sadəcə, virtual, kamera vasitəsilə izləmə olduğu üçün qəbul etmədim. Bu işdə tamaşaçı önəmlidir. Uşaqların motivasiyası olmalıdır.
İspaniyadan dəvət edilmişdik. Düşünürəm ki, yenidən dəvət gəlsə, uşaqları özlərini sınamaları üçün bu yarışa çıxaracağam. Bu aylar ərzində də yeni nömrələr hazırlayırıq. Məqsədimiz uşaqlarla – İbrahim, Kənan, Əli, Emil, Cavid ilə birgə istedad şoularında Ginnesin rekordlarını təzələməkdir.
– Bütün uşaqlardan pəhləvan yetişdirmək olar?
– Xeyr, mən bunu çox sınamışam. Gözündə qorxu olan uşaqlar bu sənətin sahibi ola bilməzlər. Komandamızda, demək olar ki, öz qohumlarımızın, bizim nəslin oğlanlarıdır. Digər bu sənətə marağı olan bir neçə gənci hazırlaşdırmağa çalışdım, amma yarışlara çıxanda gördüm ki, gözlərində qorxu var. Anladım ki, onlar bunu bacarmazlar. Biz ən çətin riskli – mismarlar, çəkic, dişdə çəki daşlarının qaldırılması məsələlərini ancaq öz uşaqlarımız üzərində sınamışıq.
– İbrahim mismarları qarın boşluğuna qoyub uzanmışdı. Üzərinə kimsə çıxdı, yoxsa necə?
– Həmin o mismarlar uşaqlar üçün nəzərdə tutulub. Bildiyimiz, gerçək mismarlardır. O mismar batırılmış taxtanın öz çəkisi 10 kq-dır. Onun da üzərinə 16 kq-a yaxın insan çıxır və İbrahim nömrəni yerinə yetirə bilir. Yarışlarda, çəkilişlərdə hamı mismarları yoxlayıb və görüb ki, hər şey gerçəkdir.
– İbrahim həm də maşın çəkib?
– Bəli, altı yaşında maşın da çəkib. Təxminən bütün nömrələri yaxşı keçib. Şüşə qırıntılarının üzərinə uzanıb, yüksəkdən üzərinə bıçaq atılıb, dişləri ilə çəkisi 10 kq-a yaxın çəki daşı qaldırıb. Hətta ən ağır nömrəsi – altı yaşında dişləri ilə “VAZ-21099” markalı avtomobili çəkib.
– Rekord nömrəniz hansı olacaq?
– Hələ düşünürük. Ola bilər ki, mismarlarla ən ağır, riskli nömrə hazırlayaq. Ya da hündürdən iti bıçaq atmaqla çətin nömrələr hazırlamağı düşünürük. Bütün nömrələr uşaqların yaşına, orqanizminə uyğun təyin edilir. Heç bir sağlamlıq problemləri yaşanmır.
Könül Cəfərli
Xeberal.az
