Bu gün Silahlı Qüvvələrin Hərbi Akademiyasının və Heydər Əliyev adına Azərbaycan Ali Hərbi Məktəbinin məzunlarının növbəti buraxılış mərasimi keçirilib.
APA-nın xəbərinə görə, buraxılış mərasimində Müdafiə Nazirliyinin rəhbərliyi, Ali Hərbi Məktəbin əməkdaşları, məzunların ailə üzvləri və digər şəxslər iştirak ediblər.
Müdafiə Nazirliyinin nümunəvi hərbi orkestrinin və kursantların ifasında Dövlət himni səsləndirilib.
Mərasimdə çıxış edən Azərbaycan Respublikası Silahlı Qüvvələrinin Baş Qərargah rəisinin müavini – Döyüş Hazırlığı və Hərbi Təhsil Baş İdarəsinin rəisi, general-leytenant Nizam Osmanov gənc zabitləri, onların valideynlərini təbrik edib.
Sonra ali hərbi məktəbi fərqlənmə ilə bitirən məzunlara diplomlar və qiymətli hədiyyələr təqdim olunub.
Məktəbi fərqlənmə ilə bitirən məzunlar üzərində ulduz və aypara təsviri olan emblemləri rəmzi yaş kötüklərinə vurublar.
Daha sonra Heydər Əliyev adına Azərbaycan Ali Hərbi Məktəbinin döyüş bayrağının təhvil verilməsi və qəbul edilməsi mərasimi olub.
Ali Hərbi Məktəbin döyüş bayrağı növbəti buraxılışın kursantlarına təhvil verilib.
Nümunəvi orkestrin və kursantların ifasında məktəbin marşı ifa edilib.
Sonda kursantlar hərbi marşın sədaları altında tribunanın önündən keçiblər.
