İdman

Cüdoçularımız Avropa çempionatında daha üç medal qazandı

Sharing is caring!

Çexiyanın paytaxtı Praqada təşkil olunan cüdo üzrə Avropa çempionatı başa çatıb.

Xəbəral.az xəbər verir ki, yarışın sonuncu günündə Azərbaycan milli komandasının 5 cüdoçusu tatamı üzərinə çıxıb.

Təmsilçilərimiz günü üç medalla tamamlayıb. İrina Kindzerska (+78 kq) gümüş, Məmmədəli Mehdiyev (90 kq) və Zelim Kotsoyev (100 kq) bürünc mükafat qazanıb.

Bununla da yarışa 9 kişi və 5 qadın cüdoçu ilə qatılan Azərbaycan yığması çempionatı 5 medalla – bir qızıl, bir gümüş, üç bürünc medalla başa vurub. Yarışın ilk iki günündə Orxan Səfərov (66 kq) birinci, Rüstəm Orucov (73 kq) üçüncü yeri tutub.

Kişilər

90 kq    

Məmmədəli Mehdiyev 1/16 finalda Yesper Smink (Niderland), 1/8 finalda Nikolas Munqai (İtaliya) üzərində qələbə qazanıb. O, 1/4 finalda macarıstanlı Kriştian Tota qalib gəlsə də, yarımfinalda rusiyalı Mixail İqolnikova uduzub. Bürünc medal uğrunda qarşılaşmada türkiyəli Mihael Zqanka da qalib gələn cüdoçumuz 3-cü yeri tutub.

100 kq

Zelim Kotsoyev 1/16 finalda polşalı Aleksey Lısenko, 1/8 finalda macarıstanlı Mikloş Çiryeniçə qalib gəlib. O, 1/4 finalda portuqaliyalı Jorje Fonsekanı da üstələsə də, yarımfinalda rusiyalı Armen Adamyana uduzub. Kotsoyev bürünc medal uğrunda qarşılaşmada bolqarıstanlı Boris Georgiyevi məğlub edib.

Elmar Qasımov 1/16 finalda Aron Fara (Avstriya), ardınca Daniel Mukete (Belarus) üzərində qələbə qazansa da, 1/4 finalda gürcüstanlı Varlam Lipartelianiyə, təsəlliverici döyüşdə bolqarıstanlı Boris Georgiyevə yenilib.

+100 kq

Uşanqi Kokauri 1/8 finalda rusiyalı Tamerlan Başayevə uduzaraq çempionatla vaxtından əvvəl vidalaşıb.

Qadınlar

+78 kq

İrina Kindzerska yarışa 1/4 finaldan qoşulub. O, serbiyalı Militsa Zabiçi, yarımfinalda ukraynalı Yelizaveta Kalaninanı məğlub edib. Finala yüksələn təmsilçimiz həlledici qarşılaşmada fransalı Romane Diçko ilə qarşılaşıb və məğlub olaraq, ikinci yeri tutub.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir