Ləğv edilmiş Nəqliyyat Nazirliyinin (hazırda Rabitə və Yüksək Texnologiyalar Nazirliyi ilə birləşdirilib-red.) Dövlət Avtomobil Nəqliyyatı Xidmətinin keçmiş rəisi Hüseyn Salamov bu yaxınlarda boşandığı keçmiş arvadı ilə məhkəməlik olub.
XəbərAl.az xəbər verir ki, Hüseyn Salamov 2015-ci il I Avropa Oyunları zamanı “Atletlər kəndi” ərazisində baş vermiş qəzaya görə həbs edilib. 2016-cı ilin sentyabrında cəzasını məntəqə tipli cəzaçəkmə müəssisəsində çəkməklə 3 il azadlıqdan məhrum edilib. Nəticədə təxminən 1 il istintaq təcridxanasında saxlanıldıqdan sonra məhkəmədən faktiki azadlığa çıxıb.
Hüseyn Salamov Türkmənistan vətəndaşı olan Kekilliyeva Selbi Bayramovna ilə 2009-cu ildə nikaha girib. Onların birgə nikahından iki övladları dünyaya gəlib. Birgə nikah dövründə Salamovun mülkiyyətində Səbail rayonu, Neftçilər prospekti, 91 ünvanında yerləşən qeyri-yaşayış sahəsi və Yasamal rayonu, Z.Əhmədbəyov küçəsi, ev 10 ünvanında tikilən yeni binanın 6-cı mərtəbəsində 11 saylı mənzil olub. Həmçinin, Bakının mərkəzindəki “Port Baku Residence” kompleksində mənzil əldə edilib. Kompleksi inşa edən “Abşeron” MTK ilə bağlanmış müqaviləyə əsasən, mənzilin dəyəri hissə-hissə ödənilməli idi. Hüseyn Salamov 2015-ci ildən həbsdə olduğundan ödənişlərin aparılması mümkün olmayıb.
İbtidai istintaq orqanı Hüseyn Salamovu sui-istifadədə təqsirləndirsə də, (məhkəmədə onun əməli daha yüngül maddəyə tövsif edilib-müəll.) həbsdə olduğu zaman əmlakının müsadirə edilməsindən, həmçinin qəzada yaralanan avstriyalı idmançının müalicəsinə xərclənmiş pulun ondan tələb olunmasından narahat olub. Həmçinin ailədə yeganə qazanc gətirən o olduğundan və hər ay evin ödənişinə görə ödəniləcək pulu həmin vaxt ödəmək iqtidarında olmadığından, həyat yoldaşı Kekilliyeva Selbi Bayramovna ilə mülkiyyətində olan Yasamal rayonu, Z.Əhmədbəyov küçəsi, ev 10 ünvanında tikilən yeni binanın 6-cı mərtəbəsində 11 saylı mənzili sataraq “Abşeron” MMC şirkətinin qalıq borcuna ödəmək qərarına gəlib. Çünki o, həbs edildikdən sonra “Abşeron” MMC-yə müvəqqəti aylıq ödəniş dayandırılıb. Buna görə də onun tələbi ilə Kürdəxanıda yerləşən Bakı İstintaq Təxridxanasına notarius dəvət olunaraq Kekilliyeva Selbi Bayramovnaya ümumi etibarnamə verib. Hüseyn Salamovun Kürdəxanıdan zəng vurub razılıq verməsi, həmçinin onun təkidi ilə Səbail rayonu, Neftçilər prospekti, 91 ünvanında yerləşən qeyri-yaşayış sahəsi və Yasamal rayonu, Z.Əhmədbəyov küçəsi, ev 10 ünvanında tikilən yeni binanın 6-cı mərtəbəsində 11 saylı mənzil satılıb. Satışdan əldə edilən pulun çox hissəsi “Abşeron” MMC şirkətinin qalıq borcuna ödənilib, həmçinin Hüseyn Salamovun təcridxanada lyuks yaşamı, məhkəmə xərcləri, ailənin xərcləri uzun müddət həmin pulla təmin olunub.
Keçmiş yüksək vəzifəli məmurun ailəsində problemlər o həbsdən çıxandan sonra başlayıb. Qadının iddiasına görə, Salamov həbsdən çıxandan sonra heç yerdə işləməyib və gününü eyş-işrətlə keçirib. Hətta dəfələrlə azyaşlı övladlarına da fiziki zorakılıq göstərib. Dəfələrlə münasibətlərinin aydınlaşdırılması üçün Hüseyn Salamovla danışıqlar aparmağa cəhd etdiyini deyən Selbi heç bir nəticə əldə etməyib. Belə olan halda 2018-ci ildə qadın boşanmaq haqda iddia qaldırıb. 1,2 aydan sonra onlar rəsmən ayrılıb. Ər isə iddia edir ki, həyat yoldaşının ona qarşı münasibətinin pozulmasının səbəbi onun həbsi, həmçinin maddi durumunun əvvəlki kimi olmamasıdır.
Qadının sözlərinə görə, keçmiş əri boşanmadan sonra ondan qisas almaq məqsədi ilə guya həbs edilərkən evdə olan 90 min ABŞ dollarını, Yasamal rayonu, Z.Əhmədbəyov küçəsi, ev 10 ünvanında tikilən yeni binanın 6-cı mərtəbəsində 11 saylı mənzilin satışından əldə etdiyi 180 min ABŞ dolları və Səbail rayonu, Neftçilər prospekti, 91 ünvanında yerləşən qeyri-yaşayış sahəsinin satışından əldə olunmuş pulları tələb etməyə başlayıb. Kürdəxanıdan birbaş özünün məlumatı və təkidi ilə əmlakların satışının həyata keçirilməsinə, pulun şəxsən sürücüsünə təqdim olunmasına baxmayaraq, bütün bunlardan xəbərdar olmadığını iddia edib.
Həyat yoldaşı Selbi həbsdə olduğu müddətdə həmin pulla yaşadıqlarıını, ailənin müxtəlif tələbatlarını ödədiyini, bahalı özəl təhsil müssisəsində 2 övladı üçün illik təhsil haqqına və həbsxanada ərinin xərclərinə sərf etdiyini bildirib.
Keçmiş məmur Nəsimi Rayon Məhkəməsində iddia qaldıraraq həyat yoldaşını Yasamaldakı mənzili, Neftçilər prospektindəki obyekti “ondan xəbərsiz sataraq” pullarını mənimsəməkdə, habelə həbs edilərkən “evdə qoyduğu 90 min dolları”, ona məxsus “Range Rover Vogue” markalı avtomobilin satışından əldə olunan 60 min dolların qalan 10 min dollarını mənimsəməkdə ittiham edib. İddia ərizəsində Salamov obyekti 400 min dollar qiymətləndirib. Sonradan iddiaçı tələbinə düzəliş verib-obyektin satışından əldə olunan 470 min manatın 443 min manatının “Port Baku”dakı mənzilin borcuna görə onun adından ödənildiyini xatırlayıb və bu dəfə qalan 27 min manatın mənimsənildiyini bildirib. Nəsimi Rayon Məhkəməsinin hakimi Cəmilə Musayevanın icraatında olan iş üzrə qərar bu ilin avqustunda keçmiş məmurun xeyrinə çıxarılıb. İddia qismən təmin olunub. Məhkəmə qətnaməsinə əsasən, qadın keçmiş ərinə 307 min 276 manat ödəməlidir. Cavabdeh tərəf, yəni Selbi Kekilliyeva birgə nikahdan əldə etdikləri əmlak və pulu mənimsəmədiyini, evləndiyi zaman Yasamaldakı mənzilə 100 min manat dəyərində cehiz apardığını, sabiq məmurun təcridxanadakı lüks yaşayışını təmin etdiyini, evin, uşaqların qayğılarına xərcləndiyini bildirib. Həmçinin əlavə edib ki, H.Salamov həbsdə olanda onun xərclərini ödəmək, evi, uşaqları saxlamaq üçün Yasamaldakı mənzilin pulundan əlavə Türkmənistandan valideyinlərinin etdiyi yardımları da sərf edib. Üstəlik Salamov həbsdən çıxandan sonra 2 ilə yaxın müddətdə heç yerdə işləməsə də, həmin pullar hesabına bahalı həyat yaşayıb.
Buna görə də qərarla razılaşmayan cavabdeh tərəf- Səlbi Kəkilliyeva apellyasiya şikayəti verəcək.
