Milli Məclisin Mədəniyyət Komitəsinin sədri Qənirə Paşayeva Bərdə rayon sakini, Vətən Müharibəsinin şəhidi Xudayar Müslüm oğlu Yusifzadənin qardaşı Məhəmməd Yusifzadə ilə görüşüb.
XəbərAl.az xəbər verir ki, Komitə sədri deyib ki adı dillər əzbəri olan şəhidimiz Xudayar Yusifzadənin və onun silahdaşlarının qəhrəmanlığı sayəsində torpaqlarımız Ermənistanın işğalından azad olunub, xalqımızın 30 illik həsrətinə son qoyulub: “Xudayar Azərbaycan Respublikasının ali ordenlərindən olan “Azərbaycan Bayrağı”na layiq görülüb.
Qəhrəman şəhidimiz həmçinin “Vətən uğrunda”, “Zəngilanın azad olunmasına görə” medalları ilə təltif edilib.
Artıq məşhur “Vətən yaxşıdır” mahnısı əsasında, sənətçilərimiz tərəfindən Xudayarın şərəfinə “Xudayar təsnifi” hazırlanaraq yayılıb.
Tanrıdan bütün şəhidlərimizə rəhmət diləyirik!
Şəhidlərimizin qanı yerdə qalmayıb. Azərbaycan tarixi zəfər qazanıb. Bu zəfər münasibəti ilə təbriki ən çox haqq edən insanlar Siz Şəhid ailələrinin üzvlərisiz.
Sizə çox minnətdarıq!
Sizi, bütün doğmalarınızı düşmən üzərində tarixi qələbə münasibəti ilə təbrik edir, yeni təqvim ili münasibəti ilə ən xoş diləklərimizi yetirirəm”!
Q.Paşayeva M.Yusifzadəyə üzərində “Şuşa Azərbaycandır” yazılmış qol saatı hədiyyə edib.
Həmçinin, Mədəniyyət Komitəsi adından, şəhidin anası Radə xanım Qurbanovaya ünvanlanmış Məktubu və üzərində “Şuşa Azərbaycandır!” yazılmış qol saatını M.Yusifzadəyə təqdim edib.
M.Yusifzadə səmimi görüş üçün təşəkkür edib.
