Cəmiyyət

Məşhur Fransa nəşrində Azərbaycanın inkişafı ilə bağlı məqalə dərc olunub

Sharing is caring!

Fransanın müsəlman icmasında böyük nüfuza malik olan “Musulmans en France” nəşrində “Azərbaycan: siyasi sabitliyin iqtisadi inkişafın təməli olduğu ölkə” adlı məqalə dərc olunub.

Məqalədə Azərbaycanın Avropa ilə Asiyanı birləşdirən iki yol şəbəkəsi də daxil olmaqla dünya standartlarına cavab verən yollara malik olduğu xüsusi vurğulanır.

Bu gün Azərbaycanın siyasət, iqtisadiyyat, multikulturalizm sahəsində uğurları beynəlxalq birlik tərəfindən qəbul edilir, müxtəlif ölkələrin mətbuatında isə bu barədə məqalələr dərc olunur. Məsələn, bu yaxınlarda Fransanın müsəlman icmasında böyük nüfuza malik olan “Musulmans en France” nəşrində ölkəmizlə bağlı məqalə dərc edilib. İslam dünyasının geosiyası məsələləri üzrə ixtisaslaşan islamşünas Karim İfrak son məqaləsində Azərbaycanın xüsusilə iqtisadiyyat sahəsində əldə etdiyi nailiyyətlərdən bəhs edib. 

Mövzu ilə bağlı “Kaspi” qəzetinin yazısını təqdim edirik:

Küllərindən doğulan ölkə 

K.İfrak məlumat verir ki, əhalisinin əksəriyyəti müsəlman olan Azərbaycan multikultural, çoxmillətli, çoxdinli və çoxdilli ölkədir: “1991-ci ildə Sovet İttifaqının dağılmasından sonra müstəqilliyini bərpa edən ölkə o vaxt siyasi, iqtisadi, sosial və təhlükəsizlik sahələrində problemlərlə üzləşib”. 

Yazar qeyd edir ki, Ermənistan bu vəziyyətdən istifadə edərək 1990-cı illərin əvvəllərində Azərbaycan ərazisinin 20%-ni işğal etmişdi: “Amma BMT Təhlükəsizlik Şurası çoxsaylı qətnamələrlə (822, 853, 874 və 884) bu işğalı pisləyib, Azərbaycanın suverenliyini, ərazi bütövlüyünü və sərhədlərinin toxunulmazlığını təsdiqləyib. Üstəlik, BMT Təhlükəsizlik Şurası işğalçı qüvvələrin Azərbaycanın bir zamanlar işğal altında olmuş ərazilərindən dərhal, tam və qeyd-şərtsiz çıxarılmasını tələb edib”. 

Müəllifin sözlərinə görə, bütün çətinliklərə rəğmən, Azərbaycan dövləti milyonlarla vətəndaşının sosial rifahının yaxşılaşdırılmasına və ölkədə təhlükəsizliyin təmin edilməsinə nail olub: “Məsələn, 2007-ci ilin birinci rübündə Azərbaycanın ümumdaxili məhsulu 41,7% artıb. Güman ki, bu, bütün dünya ölkələri arasında ən yüksək göstərici olub”.

K.İfrak vurğulayır ki, bir çox ekspertlər Azərbaycanı iqtisadiyyat sahəsində əldə etdiyi uğurlara görə “Qafqaz pələngi” adlandırıb.

Avropa ilə Asiyanı birləşdirən yol şəbəkələri 

“Azərbaycan Avropa ilə Asiyanı birləşdirən iki yol şəbəkəsi daxil olmaqla, dünya standartlarına cavab verən yollara malikdir. Bu ölkə avtomobil və dəmir yolları şəbəkələrinin inkişafı, beynəlxalq standartlara cavab verən hava limanlarının açılması və güclü ticarət donanmasının yaradılması üçün ciddi çalışıb”, – deyə Karim İfrak vurğulayıb. Onun sözlərinə görə, Azərbaycan BMT və Avropa Şurası daxil olmaqla, 40-dan çox beynəlxalq təşkilatın üzvüdür: “Azərbaycan BMT-nin rəsmən tanıdığı 193 ölkədən 170-i ilə diplomatik əlaqələr qurub. Şübhəsiz ki, bu gün “Qafqazın incisi” adlandırılan Azərbaycanın inkişafında neft gəlirləri vacib amil olub. Amma bu, ölkənin inkişafında yeganə amil deyil. Bunu Azərbaycanla neft ixracı ilə məşğul olan digər ölkələrin müqayisəsi sübuta yetirir”.

Prioritet istiqamət – iqtisadiyyatın şaxələndirilməsi 

K.İfrak vurğulayır ki, Azərbaycan iqtisadiyyatını şaxələndirib və xarici ölkələrə investisiyalar qoyub: “O, ölkə iqtisadiyyatının dayanıqlı inkişafını təmin etmək məqsədilə hər il Şimali və Cənubi Amerika, Asiya, Avropa və Yaxın Şərq ölkələrinə azı 2 milyard dollar sərmayə yatırır. Amma 2015-2016-cı illərdə prioritet istiqamət ölkə iqtisadiyyatının şaxələndirilməsi olub. Nəticədə bir çox beynəlxalq şirkətlər burada fəaliyyət göstərməyə dəvət olunub. Məsələn, hazırda Azərbaycanda bu Cənubi Qafqaz ölkəsi ilə yaxın münasibətləri ilə seçilən Almaniyanın 177 şirkəti fəaliyyət göstərir. Müqayisə üçün qeyd edək ki, Azərbaycanda Fransanın təxminən 40 şirkəti çalışır”.

Müəllifin sözlərinə görə, Azərbaycan çoxlu sayda xarici investorun cəlb edilməsi üçün biznes mühitinin yaxşılaşdırılmasının əhəmiyyətini anlayıb və bununla bağlı addımlar atıb: “Bu addımlar öz bəhrəsini verib. O, Dünya İqtisadi Forumunun 2014-2015-ci illər üçün Qlobal Rəqabətlilik İndeksində 144 ölkə arasında 33-cü yerdə qərarlaşıb”. 

Müəllif məlumat verib ki, Dünya Bankının 2019-cu il üçün nüfuzlu “Doing Business” hesabatında isə Azərbaycan 190 ölkə arasında 25-ci sırada yer alıb. 

Müsbət beynəlxalq imic 

Azərbaycan Dövlət Neft Fondunun fəaliyyətindən bəhs edən müəllif xatırladıb ki, fond Şərqi Avropa və MDB ölkələrinin dövlət təşkilatları arasında “BMT-nin Dövlət Qulluğu Mükafatı”na layiq görülən birinci dövlət qurumudur. Onun sözlərinə görə, Dövlət Neft Fondu 2018-ci ildə “Linaburq-Maduel şəffaflıq indeksi”ndə birinci yerdə qərarlaşmışdı. 

“Beləliklə, Azərbaycan müsbət beynəlxalq imici sayəsində hər zaman beynəlxalq şirkətləri cəlb edib. Hazırda ABŞ, Böyük Britaniya, Almaniya, Avstriya, İtaliya, İsveçrə, Belçika, Norveç, İsveç, Yaponiya və bir çox başqa ölkələrin şirkətləri Azərbaycanda fəaliyyət göstərir. Qeyd etdiyimiz kimi, təkcə Fransanın təxminən 40 şirkəti bu ölkədə özünü təsdiqləyib. “Alstom”, “Danone”, “Lafarge”, “Société Générale” və “Suez” kimi şirkətləri nümunə göstərmək olar. Üstəlik, Fransanın “Total” şirkəti Bakı-Tbilisi-Ceyhan beynəlxalq konsorsiumunda 5%-lik paya sahibdir”, – deyə K.İfrak qeyd edib. 

Müəllif əlavə edib ki, “Total” şirkəti hazırda “Abşeron” qaz yatağının işlənilməsinə hazırlaşır: “Bundan əlavə, şirkət böyük investisiyanın ehtiyac duyulduğu “Babək” və “Ümid” qaz yataqlarının işlənməsi ilə bağlı da müzakirələr aparır”. 

Müəllif sonda vurğulayır ki, enerji resursları ilə zəngin olan Azərbaycan ilk növbədə insan resursları ilə zəngindir: “Azərbaycan qədim tarixini unutmadan hər gün tərəqqiyə doğru irəliləyir”.

Xeberal.az

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir