Paytaxt küçələrində günün qaranlıq saatlarında piyada səhlənkarlığı tez-tez yol qəzalarına səbəb olur.
Oxu.Az xəbər verir ki, izlədiyiniz görüntülər əsasən paytaxtın A.Salamzadə küçəsi, Heydər Əliyev və Ziya Bünyadov prospektlərində qeydə alınıb.
Sürət həddi yüksək olan bu yollarda piyadaların piyada üçün nəzərdə tutulmayan yerlərdən keçərək avtomobillərin qarşısına çıxmaları qəzaya səbəb olub.
Məsələ ilə bağlı Bakı Şəhər Dövlət Yol Polisi (DYP) İdarəsinin baş inspektoru polis mayoru Araz Əsgərli Oxu.Az-ın sorğusuna cavab olaraq bildirib ki, piyadaların paytaxt yollarında keçidlərdən istifadə etməməsi özləri ilə yanaşı, digər hərəkət iştirakçılarına da təhlükə yaradır:
“Xüsusi ilə də günün axşam saatlarında piyada səhlənkarlığı ilə nəticələnən ağır yol qəzalarının sayı çoxdur. Yüksək hərəkət sürətli yollardan keçmək istəyən piyadaları diqqətli olmağa yol hərəkəti qaydalarına riayət etməyə çağırırıq. Ani səhlənkarlıq ağır nəticələrə səbəb ola bilər. Günün axşam saatlarında yolun nəzərdə tutulmayan hissəsində tam təhlükəsizlik tədbirlərinə əməl etmədən yola anidən çıxmaq olmaz. Bu da həmin şəxslərin həyatına təhlükə yaradır. Həmçinin onlar hadisə zamanı sürücüləri də çətin vəziyyətə salırlar, məsuliyyət qarşısında qoyurlar”.
Könül Cəfərli
Xeberal.az
