Cəmiyyət

Ucuz reklamla dividend qazanmağa çalışan Əli Əliyev kimi üzdəniraq siyasətçilərin yeri tarixin arxividir – Vüqar Rəhimzadə

“Son vaxtlar sosial şəbəkələrdən siyasi kapital toplamaq və məşhurlaşmaq üçün istifadə edən üzdəniraq “siyasətçi”lərin sayı artmaqdadır. Onlar qaragüruhçu və bəzi səbatsız izləyicilərin “like” və “baxışı” üçün milli maraqları arxa plana keçirməkdən belə utanıb qızarmırlar.  Bu ünsürlər 30 il bundan əvvəlki dövrün nostalgiyası ilə yaşayaraq düşünürlər ki, belə ucuz  yollarla  xalqın dəstəyini qazanacaq,  illərdir arzusunda olduqları hakimiyyəti ələ keçirə biləcəklər. Ən qəribəsi və təəccüblüsü budur ki, belələri qaranlıq  keçmişlərini unudaraq xəyallar aləminə səyahət edirlər. Amma unutmayaq ki, bizim hər birimiz  gələcəyə keçmişimizlə addımlayırıq.  Hazırda ucuz reklama üstünlük verib, “mən də varam” iddiası ilə cəmiyyətdə görüntü yaratmaq sevdasına düşənlər  sırasında təmsil olunanlardan  biri  özünü siyasi xadim məqamında  hiss edən, reallıqda isə siyasət sözünün mənasını belə dərk etməyən  Vətəndaş və İnkişaf Partiyasının (VİP) sədri Əli Əliyevdir. Görünür,  Əli Əliyev də tərəf müqabili  Əli Kərimli kimi milli kimliyini, qaranlıq keçmişini, əsl peşəsini unudaraq siyasət meydanında parlamaq xülyasını reallaşdırmaq üçün özü-özünü bilərəkdən “ulduz” xəstəliyinə yoluxdurub.   Sual oluna bilər: Niyə məhz Əli Kərimli kimi?  Ona görə ki, AXCP sədri illərdir özünüreklamı çıxış yolu hesab edərək,  milli maraqları şəxsi ambisiyalarına qurban verməklə, uğurlarımıza qara eynəkdən baxmaqla, hakimiyyətin milli maraqlara söykənən hər uğurlu addımının əhəmiyyətini azaltmaq, ictimai fikri çaşdırmaq yolunu tutmaqla  xalqdan dəstək gözləyir. Maraqlı, eyni zamanda, utancverici yanaşma deyilmi? Hələ də bu ünsürlər müxalifətçilik anlayışının mənasını dərk etmir, dövlətə, xalqa xəyanəti ictimaiyyətə müxalifətçilik kimi təqdim etməyə uğursuz cəhdlər göstərirlər.   Əli kərimlilərin ardıcılları sırasında yer alan  Əli Əliyev kimilər  nə  Azərbaycanın 30 il bundan öncəki Azərbaycan, nə də xalqın həmin xalq olduğunu unutmamalıdırlar. Dövr, zaman, ən əsası insanların düşüncələri dəyişib. Dəyişməyən Əli Əliyev, Əli Kərimli kimi siyasi qullar, şəxsi ambisiyalarının girovuna çevrilən üzdəniraqlardır. Bu baxımdan yaxşı olardı ki, özünü “dahi siyasətçi” qiyafəsində  görən Əli Əliyev heç vaxt bacarmadığı və bundan sonra da bacarmayacağı siyasətlə deyil, öz  ixtisası olan dovşançılıqla, ya da virtual təlxəkliklə məşğul olsun. Ümumiyyətlə,  ucuz reklamla dividend qazanmağa çalışan Əli Əliyev kimi  üzdəniraq siyasətçilərin yeri  tarixin arxividir.”

Bu fikirləri məşhur “91-lər”in üzvü, “İki sahil” qəzetinin baş redaktoru, Əməkdar jurnalist Vüqar Rəhimzadə KİV-ə açıqlamasında söyləyib.

Vüqar Rəhimzadə bildirib ki, Əli Əliyevin siyasi perspektivdən nəinki  danışması, hətta düşünməsi belə gülüncdür: “Hər kəs yaxşı bilir ki, Əli Əliyevin siyasi perspektivi hələ 2006-cı ildə sonlanıb. Məhz Etibar Məmmədovun qohumu olduğu üçün siyasətə atılan bu “dovşan həkimi” ailə həyatında, qohumluq əlaqələrində etdiyi rəzilliklər kimi, təmsil olunduğu partiyanı da intriqa, hərc-mərclik yuvasına çevirdiyi üçün  bir vaxtlar sədri olduğu AMİP-dən qovulub. Bu gün Azərbaycanda bilməyən yoxdur ki, Əli Əliyev heç bir haqqı-hüququ olmaya-olmaya Xalq rəssamı, professor Kamil Əliyevin mirasına sahib olmaq üçün iddia irəli sürüb. Ailə dəyərlərindən uzaq olan  birinin  bu gün xalqa mənəviyyat dərsi keçməsi, xalqın parlamentdə təmsilçisi olmaq sevdasına  düşməsi insanlar arasında ən azı ikrah hissi doğurur.  Amma Əli Əliyev  özünün kimliyindən “xəbərsiz” olsa da, xalq onun keçmişinə yaxşı bələd olduğu üçün bu günədək  qatıldığı bütün seçkilərdə layiq olduğu dəyəri verib. Parlament seçkilərində seçicilərin heç 1 faizinin  belə səsini qazanmamasından dərs almayan əli əliyevlərin yenidən millət vəkili olmaq xülyasına düşmələri onların simasızlıqlarının aydın ifadəsini yaradır.”

“Belə üzdəniraq “siyasətçi” bu gün hansı haqla  Yeni Azərbaycan Partiyasının ünvanına əsassız fikirlər səsləndirə bilər?” deyən  Vüqar Rəhimzadə əlavə edib ki,  Azərbaycanın müstəqillik tarixinin bələdçisi olan YAP-ın cəmiyyətdə nüfuzu, çəkisi göz önündədir. 760 mindən artıq üzvü sıralarında birləşdirən partiyanı cəmiyyətin avanqard qüvvəsinə çevirən bu siyasi təşkilatın  monolitliyi, sözlə əməlinin birliyi, dövlətin, xalqın gələcəyini düşünərək qəbul etdiyi qərarlar, dövrün, zamanın tələblərinə uyğun olaraq irəli sürdüyü təşəbbüslər, bir sözlə, Azərbaycanı daha güclü görmək istəyidir: “Əli Əliyev kimilər Yeni Azərbaycan Partiyasının fəaliyyət yolunu  ancaq dövlətçilik tarixindən oxuyub, öyrənə bilərlər. Nəinki partiyasını,  kiçik dövlət kimi dəyərləndirilən ailə modelini düzgün qurmağı bacarmayan birisinin bu gün heç bir haqqı, hüququ olmaya-olmaya  dövlət idarəçiliyi iddiasına düşməsi gülüncdür. Görəsən, illik xərci 200 manat olan, özünün yaxın çevrəsindən başqa 1 nəfər də olsun üzvü olmayan bir partiyanın yalnız möhürlü və qovluqlu sədri olan Əli Əliyev düşünmürmü ki, 760 minlik Yeni Azərbaycan Partiyasının hər bir üzvü 1 cümlə yazsa, qondarma VİP-in qondarma sədri ömrünü ancaq onları oxumağa sərf edə bilər.  Dərk etmirmi ki, bu gün sosial şəbəkə “ulduzu” olan  Əli Əliyev kimi qondarma siyasətçilərin də həyatını elə Yeni Azərbaycan Partiyası, onun yaradıcısı, müasir müstəqil  Azərbaycan dövlətinin qurucusu,   ümummilli lider Heydər Əliyev xilas edib? Görəsən, ümummilli lider Heydər Əliyevin rəhbərlik etdiyi Yeni Azərbaycan Partiyası ötən əsrin 90-cı illərinin əvvəllərində parçalanmağın, vətəndaş müharibəsinin bir addımlığında  olan Azərbaycanı xilas edərkən, “91-lər”, partiyanın on minlərlə üzvləri, təəssübkeşləri və tərəfdarları meydanlarda mübarizə apararkən Əli Əliyev kimilər harada idilər? Özlərini şəxsi həyatda tapa bilməyənlərin siyasət nəhənglərinin ünvanına cəfəng və həqiqətdən uzaq   fikirlər səsləndirməyə haqları varmı? Ona görə də yaxşı olar ki, Əli Əliyev “Osmanqızı”, “Bumeranq” kimi “youtube” kanallarında monoloq şoularına son qoysun, öz adına olan 4-5 saxta “facebook” səhifələrini də bağlatdırsın. Unutmasın ki, siyasətdə ucuz reklam yolu ilə qərar tutmağa çalışmaq mümkünsüzdür.  Xalq kimin kim olduğunu yaxşı bilməklə yanaşı, utopiyalara deyil, reallıqlara dəyər verir. Bu günün reallığı isə budur ki, Azərbaycan ən yüksək zirvələri fəth edir, ölkənin  ictimai-siyasi həyatında aparıcı rol oynayan, milyonların partiyası olan Yeni Azərbaycan Partiyası yeni hədəflərin gerçəkləşməsinə töhfələr verməklə dövlətimizin daha da qüdrətlənməsinə, xalqın rifahının gündən-günə yüksəlməsinə səy göstərir.  YAP xalqın partiyasıdır.  Yaxşı olar ki,  Əli Əliyev kimi  siyasətdən, yaxın tariximizin dərslərindən xəbərsiz olanlar özlərində cəsarət tapıb reallıqları etiraf edərək siyasət meydanını tərk etsinlər. Özü də birdəfəlik!”

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir