Azərbaycanın xalq artisti Azərin Türkiyənin (Anaxanım Tağıyeva) sevilən sənətçisi Başkal ilə duet oxuyub. Duet Xocalı soyqırımının ildönümünə həsr olunub. Duetə artıq klip də çəkilib və “youTube”a yerləşdirilib.
Xalq artisti Moderator.az-a açıqlamasında bu layihə barədə ətraflı məlumat verib:
“Əvvəlcə onu qeyd edim ki, Başkal bəy Qənirə xanım Paşayevanın dəvəti ilə Azərbaycanda olub, cəbhə bölgəsindəki əsgərlərimiz qarşısında konsertlər verib.
O, Azərbaycanı çox sevən, Azərbaycanın dərdini öz dərdi bilən sənətçidir. Azərbaycanın həm sevincini, həm kədərini hiss edən, bizim keçirdiyimiz hissləri keçirən qardaşımızdır. Başkal bəy bu əsəri illər öncə tək ifa etmişdi. Mənə dəvət etdi ki, bu əsəri duet şəklində ifa edək. Mövzu mənim üçün çox həssas olduğuna, Qarabağa, Xocalıya həsr olunduğuna görə tərəddüd etmədən razılaşdım”.
Azərin xanım bildirib ki, belə layihələri həyata keçirmək hər bir musiqiçinin borcudur:
“Azərbaycanın tarixindəki hadisələr, başımıza gətirilən bəlalar, soyqırımılar, faciələr heç zaman unudulmayacaq. Hər nə qədər dünya buna qulağını bağlasa da, kar və kor olsa da, bu, bizim dərdimizdir, yaşadığımız tarixdir. Bu tarixi bizdən sonra gələn nəsillərin dəqiq bilməsi və unutmaması üçün sənət adamları əllərindən gələni etməlidirlər. Söhbət təkcə musiqidən getmir, incəsənətin bütün sahələrində Qarabağ mövzusu işlənməlidir ki, biz yenidən köhnə tarixlə üzləşməyək. Başımıza dəfələrlə bəlalar gətirmiş düşmənimizlə yenidən qoyun-qoyuna olub yaşamayaq. Ən azından, bundan sonra gələn nəslin dostumuzu və düşmənimizi yaxşı tanıması üçün başımıza gətirilən bu müsibətləri qələmə alıb gələcək nəsilllərə ötürməliyik. Mən də bir sənət adamı olaraq hər zaman bu məsələdə əlimdən gələni etməyə çalışıram”.
“Tarixdə Türk millətinə, Türk insanına, müsəlmana olan bu haqsızlığa, amansız mövqeyə bir gün tarixin öz sözünü deyəcəyinə ümid edirəm. Allahdan bütün şəhidlərimizə rəhmət diləyirəm” – deyə Azərin xanım vurğulayıb.
Qeyd edək ki, əsərin musiqisi və sözləri Başkala, aranjemanı isə Hüseyn Cevahir Ünala məxsusdur. “Başkal müzik&Ahhmet Ahmet “Gramafon” müzik” isə duetə klip çəkib. Layihənin ideya müəllif isə Cavid Abidovdur.
